“Vurğun Əyyubun rəhmətə getməsindən sonra yazılanlar, baş verənlər neçə gündür mənə rahatlıq vermir”.
Reportyor.info xəbər verir ki, bu sözləri tanınmış hüquqşünas Aslan İsmayılov deyib. O, bildirib ki, Müsavat Partiyası rəhbrəliyinin Vurğun Əyyubun dəfn mərasimində öndə durmalarını, mərhum haqqında xoş sözlər səsləndirmələrinin səmimiliyinə şübhə ilə yanaşıb.
Aslan İsmayılov daha sonra yazıb: “1 il təmsil olunduqları hakimiyyətin süqutundan sonra 27 ildir özlərinin ən böyük uğurları kimi təqdim etdikləri sahəyə rəhbərlik etmiş, Müsavat Partiyasının yaradıcılarından olmuş bir şəxsi partiyadan qovub onu çərlədənlərin Vurğunun dəfninin önündə olmaları və bu gün də Öndər, Başqan olaraq qalmaları çox mətləbdən xəbər verir.
Ona görə də bu gün mənim üçün ən xeyirli addım ya bu ölkədən köçmək və əlaqəni tamam kəsmək, ya da ictimai həyatı tam tərk edib sevdiyim parkda, sevdiyim işlə məşğul olmaqdır.
Artıq 2019-cu ildə belə rəhimlərin, etibarların, surətlərin, əlikramların, qurbanların kim olduğunu ayırd edə bilməyən xalqla arzuladıqlarımın həyata keçirilməsi mümkünsüz görünür! Bir Xalq ki, öz haqqını tələb etməsin, kimin onunla səmimi olduğunu, kimin ondan öz maraqları üçün istifadə etdiyini ayırd etmək üçün öz başını işlətməsin, özü heç nəyi araşdırmasın, yaxın keçmişini tədqiq etməsin, illərlə onu aldadanları tanımasın, ancaq dedi-qodular əsasında fikir söyləsin, çox asanlıqla təhqir, böhtan yağdırsın onun gələcəyi olmaz.
Deməli hər bir xalq özü haqq etdiyi həyatı yaşayır. Mirzə Fətəli Axundovu, Həsən Bəy Zərdabini, Mirzə Ələkbər Sabiri, Cəlil Məmmədquluzadəni dinləməyən xalqı maarifləndirmək cəhdi 100 il keçməsinə baxmayaraq deyəsən ancaq xəyal olaraq qalacaq…
Bu gündən sonra mübarizəmi ancaq bir məqsəd üçün davam etdirəcəm. Uzun illərdən sonra mən o dünyada olanda yanıma gələn doğmalarım, hələ də mənə inanıb məhkəmələrimdə, yanımda olan az qism insanlar, səhifələrimdə elə belə yox, araşdırandan sonra mənə inanıb, güvənib aktiv iştirak edənlər o dünyada yaxamdan yapışıb deməsinlər: “Ay gorbagor, niyə qorxdun, niyə çəkildin, niyə bizi yarı yolda qoydun, niyə bizə belə murdar cəmiyyətin qalmasına razı olub öz rahatlığını seçdin””.
Discussion about this post