Ukrayna Təhlükəsizlik Xidməti (SBU) bu il mayın 9-da Zaporojye vilayətində Ukrayna Silahlı Qüvvələrinin komandanlığına sui-qəsd hazırlayan Rusiya FSB-nin agent-snayperini saxlayıb.
Reportyor.info xəbər verir ki, bu barədə Qaynarinfo “RBC-Ukrayna” SBU-nun “Telegram”a istinadən məlumat verir.
Qeyd edilir ki, bundan əvvəl SBU düşmən qrupunun iki təşkilatçısını saxlayıb. Daha sonra onların silah və sursatları öz mənzilində 6 yaşlı qızının çarpayısının altında gizlədən cinayət ortağı ifşa olunub.
Ukrayna xüsusi xidmət orqanları FSB agent şəbəkəsinin “Fantom” ləqəbli dördüncü üzvünün izinə düşüb. O, əlaltılarının saxlanmasından sonra gizlənib və bununla da cəzadan yayınmağa çalışıb.
İstintaqın məlumatına görə, təqsirləndirilən şəxsin rayon mərkəzinin sakini, “Vintorez” markalı səssiz atıcı snayper tüfəngindən atəş açmaqda mahir olan keçmiş hərbçi olduğu üzə çıxıb. Bu silahlar Rusiya Federasiyasının ərazisində istehsal olunur və ilk növbədə təcavüzkar ölkənin xüsusi təyinatlıları tərəfindən istifadə olunur.
Məlumatlara görə, məhz belə tüfəngdən “Fantom” cənub cəbhəsinin ön xəttində döyüşən Ukrayna Silahlı Qüvvələrinin döyüş hissələrinin komandanlığına qarşı sui-qəsd həyata keçirməli idi.
Agent şəbəkəsinin digər üzvləri zərərsizləşdirildikdən sonra FSB nümayəndəsi onunla yenidən əlaqəyə girib.
Rabitə sessiyası zamanı o, agentinin qarşısına yeni vəzifə qoyub – Rusiyanın “Sontsepek” sistemindən istifadə edilməsi üçün Ukrayna Silahlı Qüvvələrinin ön mövqelərinin koordinatlarına vermək.
Ukraynalı müdafiəçilərin yerləşdiyi yerlər haqqında kəşfiyyat məlumatları toplamaq üçün cəlb olunmuş şəxs regionun cəbhəyanı rayonlarından olan tanışlarından istifadə etməyə çalışıb.
Çoxmərhələli xüsusi əməliyyat nəticəsində Təhlükəsizlik Xidmətinin əməkdaşları rus agentini saxlayıb və bununla da düşmənin Ukrayna Silahlı Qüvvələrinin qabaqcıl bölmələrinə zərbə endirməsinin qarşısı alınıb.
Saxlanılan şəxsin yaşadığı ünvanda aparılan axtarışlar zamanı ondan beş yüzdən çox müxtəlif çaplı patron, o cümlədən snayper tüfəngindən atəş açmaq üçün 308 win patronu götürülüb.
Toplanmış sübutlar əsasında təqsirləndirilən şəxsə qarşı Ukrayna Cinayət Məcəlləsinin iki maddəsi ilə ittiham irəli sürülüb. Onu ömürlük həbs cəzası gözləyir.
