Afərin, sükanı belə saxla ki, «Əlhəsən»in babasına rəhmət oxuyaq!
Məlum olduğu kimi, bu yaxınlarda Azərbaycan Respublikasının Prezidenti Qaçqın və Məcburi Köçkünlərin İşləri üzrə Dövlət Komitəsinə yeni sədr təyin edib. Aydındr ki, hər kəs yeni sədrin Azərbaycanın «zəngin qaçqınlıq» təcrübəsinə yeni «töhfə»lər verəcəyini səbirsizliklə gözləyirdi…
Budur, cənabın «töhfəsi»si özünü çox da gözlətmədi – artıq köçkünlərə «gözaydınlığı» vermək olar. İlk «müjdə» göz önündədir – sabiq sədr «Əlhəsən»in talançılığı dövründə köçkünlərə (qaçqınlara) dövlət tərəfindən ödənilən «çörəkpulu» və kommunal xidmət xərclərindən ibarət məbləğ adətən, hər ayın 19-22-si tarixlərində (müəyyən istisnalarla!) bank kartlarına yüklənirdi. Bu gün ayın 27-sidir, amma hələ ki, kartların «daxili xarabalığında bayquşlar ulayır!»
Gecikmənin səbəbi barəsində «Qaçqınkom» özünə zəhmət verib, zavallı insanlara heç bir açıqlama (deyilənə görə bu idarənin ictimaiyyətlə əlaqələr şöbəsi də var!) verməyib. Kommunal xidmət operatorları isə «Sultan Səncər»in fərraşları kimi, köçkünlərin məskunlaşdığı «gecəqondu qarğı daxalın klüyonkadan ibarət qapısını kəsdirib, pul tələb edir!».
Bu yerdə rəhmətlik Üzeyir bəyin Azərbaycan müəlliminə həsr etdiyi bir felyeton yada düşür – sinifdə dərs aparan müəllim öz-özünə danışır: «Ay Allah, indi mən nə təhər eliyim – xirtdəyə qədər borcun içindəyəm, uşaq da bir yandan ayaqqabı istəyir?!»
Ey, «qaçqınkom» müəllim, üzünü bəri çevir, sənə bir sual ünvanlayaq: «Səncərin fərraşları»na nə cavab verək?!
Əhsən, belə getsə, sələfin «Əlhəsən» müəllimin babasına rəhmət oxumalı olacağıq – bu, naqis Azərbaycan təcrübəsidir!
Sükanı belə saxla ki, yuxarılarda təqdir olunasan!!! Köçkünlər acından qırılsalar, dünya boş qalmayacaq ki…
Acı gülüşlə, Mirzə AĞ
Reportyor.info
