Ukrayna Müdafiə Nazirliyinin Baş Kəşfiyyat İdarəsinin rəisi Kirill Budanov Pskovdakı “Krestı” aviabazasını vuran PUA-ların Rusiyadan buraxıldığını iddia edir.
O, “The War Zone” jurnalına verdiyi şərhdə “biz Rusiya ərazisindən işləyirik” deyib, lakin pilotsuz uçuş aparatlarının Ukrayna hərbçiləri, yoxsa rusiyalılar tərəfindən buraxıldığını dəqiqləşdirməkdən imtina edib.
Budanovun sözlərinə görə, hücum nəticəsində iki İl-76 nəqliyyat təyyarəsi məhv edilib, dördü isə zədələnib. Bu təyyarələr hərbi yüklərin və desantçıların daşınması üçün istifadə olunur.
Təyyarənin yuxarı hissəsində yanacaq çənləri və qanad lonjeronunun mühüm hissəsi var, dronlar xüsusi olaraq həmin hissəyə hücum edib.
“The War Zone” həmçinin məhv edilmiş təyyarəni əks etdirən “Krestı” aerodromunun peyk görüntülərini, həmçinin dronlardan birinin infraqırmızı kamerasından çəkilmiş videonun skrinşotunu dərc edib.
Baş Kəşfiyyat İdarəsindən alınan infraqırmızı video “The War Zone”un bombanı atan dronun dispetçerin nəzarəti altında olduğuna inanmağa səbəb olub. Avtonom şəkildə hücum edə bilən kamikadze dronlardan fərqli olaraq, məlum bombardmançı dronların heç biri belə qabiliyyətlərə malik deyil. Belə bir dron operator tərəfindən kulminasiya nöqtəsinə qədər idarə olunur. Bu, təkcə hücumun Budanovun iddia etdiyi kimi Rusiya ərazisindən həyata keçirildiyini deyil, həm də pilotsuz uçuş aparatların aviabazaya çox yaxından buraxıldığını göstərə bilər.
Bir gün əvvəl Ukrayna prezidenti Volodimir Zelenski yeni silahla 700 km məsafədə hədəfin vurulduğunu açıqlayıb. O, konkret yeri göstərməsə də, media onun sözlərini çərşənbə gecəsi Pskova hücumla əlaqələndirib. Pskov Ukrayna sərhədindən 700 kilometr aralıda yerləşir.
Rusiyanın hökumətyönlü teleqram kanalları pilotsuz uçuş aparatların Baltikyanı ölkələrdən uça biləcəyi ilə bağlı fərziyyələr irəli sürüblər, lakin bu məlumatın təsdiqi yoxdur.
Kreml “Pskova hücumun Estoniya və Latviya ərazisindən həyata keçirilə bilərmi” sualına cavab verməyib. Rusiya prezidentinin sözçüsü Dmitri Peskov deyib: “Bu PUA-ların marşrutu ilə bağlı belə nəticəyə gəlmək bizim hərbi ekspertlərimizin səlahiyyətindədir”.
