Oktyabrın 16-dan 17-nə keçən gecə cəbhənin cənub istiqamətində Ukraynanın Hərbi Hava Qüvvələri üç saat ərzində 15 kamikadze pilotsuz uçan aparatı, şərqdə isə 3 qanadlı raketi məhv edib.
Bu barədə Ukrayna Hərbi Hava Qüvvələrinin komandanlığı məlumat yayıb.
“Oktyabrın 17-də saat 03:30-dan 06:50-dək Cənub hava hücumundan müdafiə qüvvələri və vasitələri tərəfindən 15 pilotsuz təyyarə vurulub: 6-sı Odessa vilayəti, 9-u Nikolayev vilayəti üzərində. Oktyabrın 16-dan 17-nə keçən gecə cənub istiqamətində ümumilikdə 26 ədəd “Shahed-136″ PUA-sı məhv edilib”, – məlumatda deyilir.
Məlumatda deyilir ki, ruslar müxtəlif növ qanadlı raketlərlə şərq istiqamətində də mühüm infrastruktur obyektlərinə hücum edib.
“Həmin istiqamətdə 3 raket Hərbi Hava Qüvvələrinin zenit-raket bölmələri tərəfindən məhv edilib”, – komandanlıq əlavə edib.
“Cənub” əməliyyat komandanlığından verilən məlumata görə, bu istiqamətdə hava hücumundan müdafiə qüvvələri tərəfindən 9 “Şəhid” PUA-sı vurulub.
Qeyd edilir ki, məhv edilən PUA-lar İranın Rusiyaya satdığı dronlardır.
