ABŞ-nin keçmiş Prezidenti Donald Tramp yenidən bu posta seçiləcəyi təqdirdə inauqurasiyadan əvvəl Ukraynada sülhə nail olacağına söz verib. Amerikanın “Merit Street Media” telekanalına müsahibə verən Tramp seçiləcəyi təqdirdə, Ukrayna məsələsini hətta prezident kürsüsünə oturmadan öncə həll edə biləcəyini iddia edib: “Mən vəzifəyə başlayana qədər bununla məşğul olacağam və Ukraynadakı münaqişəni həll edəcəyəm. Seçilmiş Prezident kimi mənim böyük səlahiyyətlərim olacaq”.
Eyni zamanda Tramp qeyd edib ki, Ukraynada vəziyyət “daha da pisləşir”: “Onlar indi silah götürürlər ki, Rusiyaya dərin zərbələr endirə bilsinlər. Bütün bunlar hara gedir? Ölkəmiz dünya müharibəsinə cəlb olunmaq kimi böyük təhlükə altındadır. Bizdə bir insan (ABŞ Prezidenti Co Bayden) var ki, bununla məşğul olmalı deyil”.
