Ukrayna qoşunlarının Rusiyanın Kursk vilayətinə hücumu davam edərkən, Ukrayna hərbi rəhbərliyi həmin istiqamətə daha iki desant hücum briqadası göndərib.
“AzPolitika” xəbər verir ki, “Forbes” nəşrinin öz mənbələrinə istinadla yazdığına görə, bunlar 82-ci və 95-ci briqadalardır.
Nəşr yazır ki, bununla da Kurskdakı Ukrayna qüvvələri tam və qismən olmaqla altı cəbhə briqadasından, üstəlik iki ayrı batalyondan, PUA bölmələrindən, artilleriya, kəşfiyyat və xüsusi təyinatlılardan ibarətdir. “Forbes”in məlumatına görə, beləliklə, Kurskdakı Ukrayna qruplaşmasının sayı təxminən 15 minə çatıb.
“Forbes”-in məlumatına görə, hücumu dayandırmağa çalışan Rusiya qüvvələri ən azı doqquz motoatıcı, desant-hücum alayları və briqadalarından ibarətdir. Qeyd olunur ki, say etibarilə bu, Ukraynanın bölgədəki qüvvələrinə bərabər, hətta ondan artıqdır.
Nəşrin məlumatına görə, döyüşə getdikcə daha çox qüvvə daxil olduğundan hər iki tərəfdən itkilər artır.
“Forbes” hərbi analitiklərə istinadla qeyd edir ki, döyüşlərdə ukraynalıların hələ də üstünlüyü var və çox güman ki, Kursk istiqamətində Rusiya hərbi komandanlığı müdafiənin ikinci eşelonunu yerləşdirməli olacaq, çünki birinci eşelon Ukraynanın hücumu dayandıra bilməyəcək.
