Ukrayna Silahlı Qüvvələrinin Kursk vilayətindəki hücum əməliyyatı təkcə Rusiyada deyil, Qərb mətbuatında da şok effekti yaradıb. Bununla yanaşı, Ukrayna tərəfinin nəzarətə götürdüyü ərazilərin miqyası ilə bağlı fərqli məlumatlar daxil olmaqdadır.
Rusiya “teleqram” kanalları 400 kvadrat kilometrdən artıq ərazinin Rusiya tərəfindən nəzarət edilmədiyini bildirir.
“The Washington Post” öz mənbələrinə istinadla Ukrayna hərbçilərinin 100 kvadratkilometr ərazini nəzarətə götürdüyünü, digər ərazilərin isə “boz zona”ya çevrildiyini qeyd edib. Nəşrin məlumatına görə, Kursk vilayətində keçirilən əməliyyata Ukrayna Silahlı Qüvvələrinin elit hücum briqadalarından minə yaxın əsgər cəlb olunub. Onlar Amerika və Almaniya zirehli texnikası ilə, tanklarla təchiz olunub. Ərazidə Ukarynaya aid helikopterlər də fəaliyyət göstərir.
Bu arada Kremlin təbliğatçılarından olan tanınmış hərbi şərhçi Yuriy Podolyaka yaxın günlərdə Ukrayna Silahlı Qüvvələrinin yeni, daha güclü hücumunun olacağını deyib: “Bu, bizim sərhəd bölgəmizdəki döyüşlərin sonu deyil. Görünür, sabah və ya o biri gün yeni-köhnə istiqamətdən daha bir aktiv hücumdan danışacağıq. Burada düşmən daha böyük qüvvələrlə növbəti hücum əməliyyatına hazırdır”.
