Ucar rayonunda 65 yaşlı kişi ailə münaqişəsi zəminində yaranan mübahisə zamanı qardaşı oğluna xəsarət yetirib.
Hadisə ötən ilin iyulun 29-da rayonunun Qaradağlı kəndində baş verib.
Kənd sakini, 1960-cı il təvəllüdlü Mahir Qəhrəmanov kənddə yerləşən evin həyətində qardaşı oğlu Həmidin (ad-soyad şərtidir – red.) həmkəndlisi Ramalı döydüyünə görə irad tutub.
Bu zaman onların aralarında şəxsi münasibətlər zəminində mübahisə yaranıb. Mübahisə zamanı Həmid əmisinin ünvanına nalayiq söyüşlər söyüb. Bu söyüşlərdən yaşlı kişi əsəbiləşib və sərxoş vəziyyətdə qisas almaq məqsədilə yaşadığı evin həyətindəki çardağın altında olan stolun üzərindən götürdüyü bıçaqla onun bədəninin müxtəlif nahiyyələrinə 4 zərbə vurub.
M. Qəhrəmanovun barəsində Cinayət Məcəlləsinin 126.1-ci (qəsdən sağlamlığa ağır zərər vurma) maddəsi ilə ittiham elan edilib.
İş üzrə izahat verən təqsirləndirilən şəxs ona elan olunmuş ittiham üzrə özünü təqsirli bilib. O, ifadəsində göstərib ki, zərərçəkmiş Həmid onun qardaşı oğludur: “İyulun 29-da, saat 21 radələrində yaşadığım Qaradağlı kəndində yerləşən fərdi yaşayış evində olan zaman Həmid oraya gəldi. Qonşumuz Ramalı küçədə döydüyünü və sonuncunun şikayət etməməsi üçün məsələni yoluna qoymağı dedi. Mən isə Ramalın yaşadığı evə getdiyimi, onun anasına bu barədə xahiş etdiyimi və xahişimi nəzərə alaraq şikayət etmədiyini dedim. Həmin günü doğum günüm olduğu üçün təxminən 1 saat əvvəl evdə təkbaşına 500 qram araq içmişdim. Ramalın anası ilə danışdıqdan sonra evin həyətində yerləşən çardağın alt hissəsində olarkən qardaşım oğlu məndən məsələnin həll olunub-olunmadığını soruşdu. Mən isə anası ilə danışaraq məsələni yolun qoyduğumu söylədim. Bu məsələyə görə qardaşım oğlunu danlamağa başladım”.
Məhkum qeyd edib ki, bu zaman Həmid ona söyüş söyərək dalaşmağa başlayıb: “Ardınca əynimdə olan köynəyimi dartaraq cırdı. Sonra bədənimin müxtəlif nahiyələrinə təpik və yumruq zərbələri vuraraq məni döydü. Bundan sonra zərərçəkmiş şəxs həmin yeri tərk edərək evə getdi. Mən isə orada qaldım. Bundan təxminən 2-3 dəqiqə sonra zərərçəkmiş şəxs mətbəxdə işlətdiyimiz bıçaqla mənə tərəf gəldi. Mən bunu görərək qaçmaq istədim. Zərərçəkmiş şəxs badalaq fəndi işlədərək məni yerə yıxdı. Bu zaman mən xəsarət aldım. Daha sonra yerdə uzanmış vəziyyətdə olan zaman zərərçəkmiş şəxs mənim sol qabırğa nahiyəmin üst hissəsinə təpiklə bir neçə zərbə vurdu. Ardınca isə bıçaqla mənə zərbə vurmaq istəyərkən əlim ilə onun sağ bilək nahiyəsindən yapışdım, biləyini sıxdım. Bıçaq əlindən yerə düşdükdən sonra zərərçəkmiş şəxs əli ilə məni boğmağa başladı. Bu zaman məcbur olaraq bıçağı yerdən götürdüm və bir neçə dəfə ona zərbə endirdim. Lakin neçə zərbə vurmağımı xatırlamamışam. Zərbənin təsirindən zərərçəkmiş şəxs məndən kənarlaşdı. Bundan sonra ona bıçaqla xəsarət yetirməyi dayandırdım. Sonra bıçağı qabın alt hissəsində gizlətdim, həyətdə olan otluq sahədə yatdım. Səhər vaxtı Ucar Rayon Polis Şöbəsinə gedərək təslim oldum”.
Bu cinayət işinə Şəki Ağır Cinayətlər Məhkəməsində baxılıb. Məhkəmənin hökmü ilə M. Qəhrəmanovun barəsində Cinayət Məcəlləsinin 70-ci (şərti məhkum etmə) maddəsi tətbiq olunub. Ona 2 il sınaq olmaqla 3 il 6 ay müddətinə şərti cəza təyin olunub.
Təqsirləndirilən şəxsin barəsində seçilmiş həbs qətimkan tədbiri başqa yerə getməmək haqqında iltizam qətimkan tədbiri ilə dəyişdirilib. O, həbsdən azad edilib.
