İstanbuldakı partlayış seçkiyə hazırlaşan Türkiyənin daxili siyasətinə yönəlib.
Bu sözləri siyasi ekspert Asif Nərimanlı partlayışın terror olması fonunda iki məqama diqqət çəkib:
“İstanbuldakı partlayışın terror aktı olması ehtimalı üzərində dayanılır, rəsmi açıqlamalar da bu yöndədir. Yekun nəticə hələ açıqlanmır, lakin partlayışın terror olması fonunda iki məqam diqqət çəkir:
– Niyə indi baş verir və hədəfi nədir?
– Türkiyədə davamlı terror aktlarları nə vaxt səngimişdi?
Sonuncu dəhşətli terror hücumu 2016-cı ilin son günü, 2017-ci ilə keçən gecə baş verən Reina aktı idi. Buna qədər Türkiyədə davamlı şəkildə terror hücumları yaşanırdı. Reina terrorundan sonra hücumlar səngidi, xüsusilə İstanbul kimi böyük şəhərlərdə.
Bu, Türkiyənin təhlükəsizliyi gücləndirməsindən daha çox geosiyasi proseslərdən qaynaqlanırdı. Xüsusilə Reina terrorunun törədildiyi təqvim ABŞ-da demokratların hakimiyyəti təhvil verməsi ərəfəsinə təsadüf etməsi diqqət çəkirdi. Respublikaçıların dövründə Türkiyənin terrorla hədəfə alınması prosesi də səngidi.
Və indi şəhərin mərkəzində yenidən partlayış baş verir. Ki, bunun terror aktı olması təsdiq edilərsə, demokratların (buna qlobalçılar da deyə bilərik) dönüşündən sonra olması diqqət çəkir”.
Ekspert bildirib ki, bu, əgər terror hücumudursa, davamlı ola biləcəyi istisna deyil.
