Türkiyə Silahlı Qüvvələrinin Suriyanın Afrin bölgəsində apardığı “Zeytun budağı” əməliyyatı çərçivəsində Racu şəhəri terrorçulardan azad edilib. Bu əməliyyatın başlanıldığı vaxtdan bəri Afrində azad edilən ikinci rayon mərkəzidir.
Reportyor.info “Anadolu”ya istinadən bildirir ki, anti-terror əməliyyatının iştirakçıları Suriyanın şimal-şərqində uğurlu şəkildə irəliləməkdə davam edirlər.
Saytın Suriyaya ezam olunmuş müxbirinin verdiyi məlumata görə, Racu şəhərinin azad edilməsi ilə bağlı əməliyyat martın 3-də səhər saatlarında başlayıb.
Şiddətli toqquşmadan sonra YPG/PKK yaraqlıları şəhər kənarından Racunun mərkəzinə çəkilib. Daha sonra türk birləşmələri şəhərin böyük hissəsini nəzarətə götürüb. Hazırda mərkəzin terrorçulardan təmizlənməsi üçün reydlər keçirilir, istehkamçılar yollarda və binalarda potensial minaların axtarışı ilə məşğul olur.
Türkiyə Silahlı Qüvvələri martın 3-də bundan başqa, “Azad Suriya Ordusunun” dəstələri ilə birgə Afrinin cənub-qərbində yerləşən Ramadiyə və Hamilək kəndlərini də terrorçulardan təmizləyib.
