Hazırda bir sıra partiyaların vahid təşkilatda birləşməsi ilə bağlı müzakirələr aparılır. Bu barədə qaynarinfo yazıb ki, Böyük Azərbaycan Partiyası (BAP), Azərbaycan Xalq Partiyası (AXP), Azərbaycan Milli İstiqlal Partiyası (AMİP) və AĞ Partiya birləşməklə bağlı müzakirələrə başlayıblar. Məlumatı verən mənbə iddia edib ki, adları çəkilən partiyalar Milli İstiqlal Partiyasında birləşəcək və təşkilata rəhbərlik Arzuxan Əlizadəyə həvalə olunacaq. Digər 3 partiyanın sədrləri isə AMİP-də müavin postunda yer alacağı bildirilir.
Tribunainfo.az bildirir ki, bu xəbərə reaksiya verən AĞ Partiyanın sözçüsü Cavanşir Abbaslı yayılan məlumatı təkzib edib. Onun sözlərinə görə, AĞ Partiya olaraq, bəyan edirik ki, bizim partiya hazırda istər elektoratına, istərsə də nüfuzuna görə ölkədə ilk sıradadır: “Bu partiyanın heç bir partiyaya nəinki birləşmək, heç bir partiyanı belə özünə birləşdirmək fikri yoxdur. Bu cür dezinformasiyalar yayanda belə azından AĞ Partiyanın mövqeyi nəzərə alınmalıdır. Bu həm də bir jurnalistika prinsipidir. Bundan sonra qərəzli məlumatlar yayan dostlara səslənirik, lütfən nəzərə alın!”
