İbrahimov Elşən Məhəmməd oğlu hərbi xidməti başa vurub doğulduğu Tovuza qayıdan ərəfədə iyul döyüşlərinin başladığını eşidir. Bu səbəbdən orduda qalmaq qərarı verir və Ağcabədidəki “N” saylı hərbi hissədən Beyləqan hərbi hissəsinə göndərilir. Reportyor.info-ya danışan E.İbrahimovun sözlərinə görə, iyulun 13-də MAXE kimi fəaliyyətə başlayıb. Hərbçi piyadaların döyüş maşınında (BMP) sürücü vəzifəsi tutub. O, Füzulinin Alxanlı kəndi istiqamətinə qədər irəlilədiklərini danışıb: “Üç kəndi azad edib Hadrut istiqamətində sürətlə gedirdik, onların postlarını, texnikasını məhv etmişdik.
Hadrut tərəfdə yüksəklikdən bizim texnikanı vurdular, maşın komandirim Çobanov Orxan, leytnanat Aqil Məcidov şəhid oldular, Allahın işidir ki, yaralansam da oradan sağ çıxa bildim”.
E.İbrahimov bildirib ki, bədənində çoxlu yanıq xəsarətləri var. Qazimiz dövlətin qayğısından, həkimlərin fədakarlığından çox razıdır. Onun sözlərinə görə, ordunun yeganə hədəfi Qarabağı azad etmək olub.
“Şəhidlərin yeri cənnətdi. Aqil Məcidov dedi ki, işğalda olan torpaqlarımızda bulaqlarımız var, azad edək, gedib gəzərik, dincələrik o gözəl yerlərdə. Aqil Məcidov yaralı halda düşməni söyürdü, son nəfəsində dedi Qarabağ Azərbaycandır və şəhid oldu” – E.İbrahimov danışıb.
Discussion about this post