Mayın 17-də gecə və səhər saatlarında Rusiyanın bir neçə bölgəsi və işğal edilmiş Krım yarımadası pilotsuz təyyarələrin hücumuna məruz qalıb.
“AzPolitika” Rusiya mətbuatına istinadla xəbər verir ki, Ukraynaya məxsus pilotsuz təyyarələr Krasnodar vilayətinin Tuapse şəhərindəki neft emalı zavoduna zərbə endirib. Regional əməliyyat qərargahının məlumatına görə, hücumda iki pilotsuz təyyarə iştirak edib.
Məlumatda qeyd olunur ki, dronların düşməsi nəticəsində neft emalı zavodunun ərazisində yanğın baş verib. İlkin məlumata görə, itki yoxdur. Səlahiyyətlilər daha sonra yanğının qarşısının alındığını bildiriblər. Tuapse kurort şəhəri Qara dənizin sahilində, Soçi və Krasnodar yaxınlığında yerləşir və əsas liman hesab olunur.
“Rosneft”in neft emalı zavodu da Tuapsedə yerləşir. Yanvar ayında onun müəssisələrindəki vakum qurğusu pilotsuz təyyarənin zərbəsi nəticəsində sıradan çıxarılmışdı.
“Astra” “Telegram” kanalının məlumatına görə, Novorossiyskdə yerli sakinlər 35-dən çox partlayış səsi eşidiblər. “Mash” “Telegram” kanalı yazır ki, dəniz limanı hücuma məruz qalıb. Başqa kanallar da dron zərbələrindən sonra Novorossiyskdə ictimai nəqliyyatın işləmədiyini, təhsil müəssisələrində dərslərin ləğv edildiyini, bəzi küçələrin bağlandığını, dəmiryol vağzalı yaxınlığında neft qurğusunun yandığını bildiriblər.
Krasnodar diyarının qubernatoru Veniamin Kondratyev bildirib ki, Ukrayna Silahlı Qüvvələrinin gecə saatlarında “Novorossiysk ərazisində mülki obyektlərə hücum cəhdi” uğursuz olub. Onun sözlərinə görə, hava hücumundan müdafiə sistemləri 10-dan çox pilotsuz uçan aparatı vurub, nəticədə yerdə kiçik yanğınlar baş verib, onu da söndürüblər. Ölən və yaralananlar olmayıb. Lakin o, pilotsuz təyyarənin hücumu nəticəsində hansı obyektlərin zədələndiyini dəqiqləşdirə bilməyib.
Mayın 17-nə keçən gecə pilotsuz təyyarələr işğal edilmiş Sevastopola da hücum edib. Şəhərin Rusiya tərəfindən təyin edilmiş qubernatoru Mixail Razvozyaev iddia edir ki, rus hərbçiləri onlarla dron və beşdən çox pilotsuz qayığı məhv edib. Ölən və yaralananlar olmayıb.
Gecə hücumundan sonra Sevastopol yarımstansiyası zədələnib. Razvozyaevin sözlərinə görə, onun bərpası təxminən bir gün çəkəcək. “Bərpa işləri aparılarkən, şəhər kifayət qədər enerji ala bilməyəcək, buna görə də elektrik enerjisində fasilələr olacaq”, – o əlavə edib.
Hakimiyyət bütün məktəblərdə və uşaq bağçalarında dərsləri ləğv etmək qərarına gəlib.
Rusiya Müdafiə Nazirliyi 102 PUA-nın məhv edildiyini bildirib. Məlumatda iddia olunur ki, Krım səmasında 51, Krasnodar diyarı üzərində isə 44 pilotsuz təyyarə vurulub. Həmçinin Belqorod və Kursk vilayətləri üzərindədə dronlar məhv edilib. Qara dənizdə Ukraynaya məxsus 6 pilotsuz katerin də məhv edildiyi iddia olunur.
Belqorod vilayətinin qubernatoru Vyaçeslav Qladkov bildirib ki, kamikadze pilotsuz təyyarənin avtomobilə hücumu nəticəsində iki nəfər – qadın və onun dörd yaşlı uşağı həlak olub. Daha bir pilotsuz təyyarə Bessonovka kəndi yaxınlığındakı yanacaqdoldurma məntəqəsinə düşüb. Partlayış nəticəsində çənlərdən biri yanıb. Qladkov yazır ki, yanğın tez bir zamanda söndürülüb.
Ukrayna tərəfi hücumlarla bağlı rəsmi açıqlama verməyib.
