Türkiyə Böyük Millət Məclisində (TBMM) “Terroruz Türkiyə” hədəfi ilə yaradılan yeni komissiya ilk iclasını keçirib. TBMM sədri Numan Kurtulmuş açılış nitqində Türkiyənin yarım əsrdən çoxdur mübarizə apardığı terror probleminə yeni bir dövrün başladığını vurğulayıb.
Kurtulmuş çıxışının əvvəlində millət vəkillərinə və mətbuata müraciət edərək, “Millətlərin tarixində elə anlar var ki, təkcə bu günü deyil, gələcəyi də formalaşdırır. Bu gün həmin günlərdən biridir” deyib.
“Silahların susması millətin iradəsidir”
Kurtulmuş komissiyanın əsas missiyasının Türkiyəni terror bəlasından tamamilə xilas etmək və cəmiyyətdə sülhü gücləndirmək olduğunu bildirib. O, “Silahların tamamilə susması və təşkilatın özünü ləğv etməsi heç bir şəxsin, qurumun və ya siyasi təşkilatın deyil, birbaşa əziz millətimizin iradəsidir” deyərək, bu prosesin millətin sülh və birlik qətiyyətinin nəticəsi olduğunu vurğulayıb.
Kurtulmuş terrorun Türkiyəyə təkcə insan itkiləri deyil, həm də böyük iqtisadi və sosial zərərlər verdiyini xatırladıb: “Əgər büdcəmizi illər boyu terrorla mübarizəyə yox, inkişafa sərf etsəydik, bir çox məktəb, universitet və xəstəxana daha əvvəl tikilə bilərdi. Ən ağır bədəli isə canımızla ödədik. Şəhidlərimiz və qazilərimiz bu prosesin mənəvi memarlarıdır.”
Cəmiyyətdə qardaşlıq və birlik mesajı
Kurtulmuş çıxışında Türk-Kürd qardaşlığına xüsusi vurğu edib. O, “Çanaqqalada çiyin-çiyinə döyüşənlərin nəvələriyik. Tale yoldaşlığı təkcə döyüş meydanlarında deyil, ağrıda, ümiddə və zəhmətdədir” deyərək, birlikdə yaşamaq iradəsinin köklü bir tarixi mirasdan gəldiyini bildirib. O, Səlahəddin Əyyubi, Nurəddin Zəngi, Alp Arslan və Qılıç Arslan kimi tarixi şəxsiyyətləri nümunə gətirib.
Kurtulmuş Əhməd-i Xani, Mehmet Akif və Nazim Hikmətin şeirlərindən sitatlar gətirərək cəmiyyətdə sülh və qardaşlığın mədəni əsaslarını xatırladıb: “Xalqların qəlbi ədalətlə bərabər döyünərsə, millət olunur. Dil dəyişir, coğrafiya dəyişir, ancaq ortaq hisslər dəyişməz qalır.”
Komissiyanın yol xəritəsi: Şəffaflıq, açıqlıq, plüralizm
TBMM sədri komissiyanın üç əsas prinsiplə fəaliyyət göstərəcəyini elan edib:
Bu proses Türklərin və Kürdlərin ortaq gələcəyini maraqlandıran bir beka məsələsidir. Bu çatı altında aparılan hər bir iş xalqın gözü qarşısında həyata keçiriləcək. Komissiyanın iş prinsiplərini ilk gündən açıq şəkildə ifadə etməliyik.
Bunlardan birincisi şəffaflıqdır. Millətimizin atılan hər bir addımı bilməyə haqqı var.
Digər prinsipimiz açıqlıq olmalıdır; gizli gündəmlərin cəmiyyətin sülhünə heç bir faydası yoxdur.
Üçüncü prinsipimiz isə plüralizm (çoxluq) olmalıdır
Kurtulmuş, komissiya işlərinin cəmiyyətin bütün hissələrini əhatə edəcəyini, fikir liderlərinin, universitetlərin, hüquqşünasların və QHT-lərin töhfələrinin önəmli olduğunu söyləyib.
Cəmiyyət psixologiyasının doğru idarə edilməsinin vacibliyini vurğulayan Kurtulmuş, “Kürdün onurunu qorumayan, Türkün qüruruna hörmətsizlik edən dil sülhə yox, incikliyə səbəb olur” deyib.
Terrorsuz Türkiyə, terrorsuz bölgə hədəfi
Kurtulmuş çıxışında prosesin təkcə Türkiyə üçün deyil, region üçün də əhəmiyyətli olduğunu vurğulayıb. “Birinci Dünya müharibəsindən sonra bir-birindən ayrılan, aralarına tikanlı məftillər çəkilən xalqlar artıq yenidən bir-birini ucadan eşitməyə layiqdir. Atdığımız hər addım bu coğrafiyada sülh və qardaşlığı gücləndirməyə yönəlib. Terroruz Türkiyə demək, əslində terroruz bir bölgə deməkdir.”
TBMM sədri, komissiyanın təkcə müzakirə və hesabatlarla məhdudlaşmayacağını, silahların təhvil verilməsi prosesini millət adından izləyəcəyini, lazımi qanun layihələri hazırlayıb Məclisin ümumi iradəsinə təqdim edəcəyini qeyd edib.
“Bu masa millətin vicdanı ilə quruldu”
Çıxışının sonunda Kurtulmuş bu tarixi prosesin əhəmiyyətini belə yekunlaşdırıb: “Bu masa millətin vicdanı, ağlı və inamı ilə qurulub. Demokratik, plüralist və hər kəsin özünü bu ölkəyə aid hiss etdiyi bir Türkiyəni hamımız birlikdə inşa edəcəyik. Allah yardımçımız olsun”.
