“Azərbaycan Vətənpərvərləri” İctimai Birliyinin Sumqayıt təşkilatının sədri, boks üzrə məşqçi Ramil Məmmədzadə fiziki hücuma məruz qalıb.
Reportyor.info xəbər verir ki, aldığı zərbələr nəticəsində onun çənə sümüyü sınıb.
Ramil Məmmədzadə xəbəri təsdiqləyib. O, bildirib ki, hadisə yanvarın 6-da Sumqayıt şəhəri 30-cu məhəllə ərazisində baş verib. Təşkilat sədri əlavə edib ki, ona xəsarət yetirən şəxsi əvvəldən tanıyır.
Ramil Məmmədzadənin sözlərinə görə, Sumqayıt Şəhər Polis İdarəsinin 4-cü bölməsinə müraciət edib. Polis məsələyə operativ yanaşaraq ona xəsarət yetirən şəxsi saxlayıb. Daha sonra Sumqayıt Şəhər Polis İdarəsində faktla bağlı Cinayət Məcəlləsinin 127.2.3-cü (Qəsdən sağlamlığa az ağır zərər vurma – ümumi təhlükəli üsulla və ya xuliqanlıq niyyəti ilə törədildikdə) maddəsi ilə cinayət işi başlanıb.
“İstintaq getdiyi üçün məsələnin detallarını açıqlaya bilmirəm. Onu deyə bilərəm ki, mənə qarşı törədilən bu əməlin sifariş olduğunu düşünürəm”, deyə Ramil Məmədzadə bildirib.
Qaynarinfo məsələ ilə əlaqədar Daxili İşlər Nazirliyi (DİN) də əlaqə saxlayıb. DİN məlumatı təsdiqləyib. Nazirlikdən bildirilib ki, hazırda cinayət işi ilə əlaqədar istintaq tədbirləri görülür.
Ramil Məmmədzadənin atası Rafael Məmmədov Birinci Qarabağ savaşında şəhid olub(Qaynarinfo.az).
