İsmayıllı rayonuna gedən yerli turistin sakinlər tərəfindən təzyiqə məruz qaldığı deyilir. Bununla bağlı görüntülər sosial şəbəkələrdə yayılıb. Məlumata görə, rayonun Qalacıq kənd sakinləri istirahətə gələn turistin şort geyinməsinə irad tutaraq, ona etirazlarını bildiriblər. Yerli sakinlərin bu addımı sosial şəbəkələrdə birmənalı qarşılanmayıb.
Məsələ ilə bağlı Bakupost.az-a açıqlama verən millət vəkili Etibar Əliyev bildirib ki, burada etiraz doğuracaq bir səbəb məsələ yoxdur:
“İsmayıllı turizm baxımından cəlbedici yerdir. Buna görə də insanlar ora maraq göstərir. Ölkəmizə turist axının tərəfdarıyıq. Bütün dünyada turizm çox böyük gəlir gətirir. İsmayıllıya gələn istər yerli, istərsə də xarici turistlərə geyimlə bağlı xəbərdarlıq etmək yaxşı olmaz. Turistlər səyahət etmək üçün bura gəlirlər. Bu yaxınlarda rayonların birində istirahət mərkəzində xeyli şort geyinən yerli və xarici turistlər gördüm. Lakin ətrafda onlara qarşı heç bir etiraza rast gəlmədim. Burada etiraz əlaməti olan heç bir şey görmürəm. Bilmirəm, İsmayıllıda bu niyə baş verib? Hava istidir, yerli və xarici turistlərin o geyimdə olmaları təbiidir. İnsanlar sərbəst geyim kimi ondan istifadə edirlər”.
E.Əliyev bildrib ki, turistin geyimi kütləvi etiraza səbəb olmamalıdır:
“Ola bilər, kimsə müəyyən ənənələrə görə buna etiraz edir. Lakin bu kütləvi etiraz xarakteri daşımamaldır. Yaydır, istidir və turist sərbəst geyimdən istifadə edirsə, bu, onun şəxsi işidir, kiminsə müdaxilə etməyi doğru deyil. Buna kütləvi etirazın edilməsi hardasa təşkil olunmuş məsələyə oxşayır. Bu geyimin geyilməsinin köklü ənənələrə elə bir təsiri yoxdur. Turistin davranışında əgər hansısa qüsur aşkar olunursa, əlbəttə, bununla bağlı otel rəhbərliyi ölçü götürə bilər. Qalan hallarda geyim kütləvi etiraza səbəb olamamaldır”.
