Narkoekspert Emil Maqalov da şikayətçilər sırasına qoşuldu – sifarişlər bir aydır gömrükdə saxlanılır
Son dövrlər müxtəlif sahələrdən olan tanınmış şəxslərin gömrük orqanlarının fəaliyyəti ilə bağlı narazılıqları artmaqdadır. Bu dəfə isə narkoekspert Emil Maqalov gömrükdə yaranmış problemlərlə bağlı ictimaiyyətə açıqlama verənlər sırasına qoşulub.
Reportyor.info AzTimes.az-a istinadən xəbər verir ki, Emil Maqalov şəxsi sosial şəbəkə hesabında paylaşım edərək, xaricdən sifariş etdiyi məhsulların bir aydan artıqdır ki, gömrükdən buraxılmadığını bildirib. Onun sözlərinə görə, bütün tələb olunan qaydalara əməl edilməsinə baxmayaraq, sifarişlərin saxlanılmasına dair aydın və əsaslandırılmış izahat təqdim olunmur.Maqalov qeyd edib ki, dəfələrlə müraciət etməsinə baxmayaraq, məsələ ilə bağlı konkret cavab ala bilməyib. Narkoekspert bu cür halların təkcə onunla bağlı olmadığını, son zamanlar bir çox vətəndaşın oxşar problemlərlə üzləşdiyini vurğulayıb.“Qanunvericiliyin tələblərinə uyğun şəkildə sifariş vermişəm. Lakin buna baxmayaraq, məhsullarım artıq bir aydan çoxdur ki, Azərbaycan Respublikasının Dövlət Gömrük Komitəsi tərəfindən gömrükdə saxlanılır. Nə səbəb göstərilir, nə də real izahat verilir”, – deyə Emil Maqalov bildirib.Məsələ ilə bağlı diqqət çəkən məqam ondan ibarətdir ki, son həftələrdə məşhur simalar, sahibkarlar və sadə vətəndaşlar da Azərbaycan Respublikasının Dövlət Gömrük Komitəsinin fəaliyyəti ilə bağlı oxşar iddialar səsləndirirlər. Şikayətlər əsasən sifarişlərin uzun müddət gömrükdə saxlanılması, əlavə rüsum tələbləri və prosesin qeyri-şəffaf aparılması ilə bağlıdır.Ekspertlər hesab edirlər ki, bu cür halların artması həm vətəndaş məmnuniyyətinə, həm də ölkənin ticarət mühitinə mənfi təsir göstərir. Xüsusilə onlayn alış-verişin geniş yayıldığı bir dövrdə gömrük prosedurlarında yaranan süni gecikmələr ictimai narazılığı daha da dərinləşdirir.
Məsələ ilə bağlı Azərbaycan Respublikasının Dövlət Gömrük Komitəsinin rəsmi mövqeyi hələlik açıqlanmayıb.
