Vətən müharibəsinin iştirakçısı, 2-ci qrup əlil Hüseyn İbrahimov Salyan rayon İcra Hakimiyyəti və yerli təhsil şöbəsi tərəfindən get-gələ salınmaqdadır. Reportyor.info xəbər verir ki, qazi rayonun Kərimbəyli kəndindəndir, 2019-cu ildə ali təhsilini bitirib, 2020-də isə 44 günlük müharibədə döyüşüb.

Onun sözlərinə görə, 2-ci qrup əlildir, sağ əli işləmir, bağırsaqlarına kapron qoyulub. Qazi deyir ki, ona verilən sığorta pulu da müalicəsinə gedir. H.İbrahimov bildirir ki, ona təsir edən Salyan rayon təhsil şöbəsi tərəfindən süpürgəçi işinə götürülməsidir:

“Mən döyüşüm, sonra gəlib xadiməçi işləyim? Budur mənə qoyulan hörmət. Hər dəfə yol verirlər ki, düzələcək. Süpürgəçi işinə sözüm yoxdur, o da bir işdi, o işi görən də anamızdır, amma mən ali təhsilliyəm, qaziyəm, məni süpürgəçi eləmisiniz. Evimdə su damır, taxtalı evdə yaşayıram, sığorta pulumdan da müalicəmə gedir”.
Əlbəttə, qazi düşmənin işğalına son qoymayıb ki, indi süpürgəçi olsun. Bu, ona qarşı hörmətsizlikdir.

Bunun da əsas günahkarı Salyan rayon rəhbərliyidir. İcra başçısı Sevindik Hətəmov qazi ilə maraqlansaydı, ona münasib bir işlə təmin edərdi. Amma icra başçısı kabinetində “qış yuxusu”na getdiyi üçün qazinin süpürgəçiyə çevrilməsindən bixəbərdi. Hər bir rayon rəhbəri prezidentin yerlərdə təmsilçisidir və onların borcudur ki, bölgələrdə qazilərin problemləri ilə maraqlansınlar. Hər yükü dövlətin üzərinə qoymaq olmaz. S.Hətəmov Salyana təhkim olunubsa, orada qazilərlə, şəhid ailələləri ilə görüşməlidir.