Bakı-Ələt–Astara yolunun üzərindəki restoranlar və yanacaqdoldurma məntəqəsi sökülməsi ilə bağlı yeni və əlavə məlumatlar yayılıb. Reportyor.info bildirir ki, sosial şəbəkə istifadəçilərinin bəziləri Salyan ərazisində sökülən obyektlərin məsələsinin rayon icra başçısı Sevindik Hətəmov tərəfindən qaldırıldığını iddia ediblər. Onların sözlərinə görə, əvvəlki İH başçısı Tahir Kərimovla dil tapmış sahibkarlar restoranlarını açıblar. Salyanın hazırkı icra başçısı isə onların sökülməsində rol oynayıb. Deyilənə görə, obyekt sahibləri S.Hətəmovla hesablaşmayıblar. Salyanın icra başçısının yuxarılar qarşısında məsələ qaldırdığı və obyektlərin sökülməsinə nail olduğu, bu yolla iş adamlarını cəzalandırdığı bildirilir. Halbuki, obyektlər uzun müddətdir xidmət göstərirdi və əgər sənədsiz idisə belə, asanlıqla sənədləşdirmək olardı, yerlə-yeksan etməyə zərurət yox idi. Prezident dəfələrlə məmurlara, icra başçılarına sahibkarlara dəstək olmağı, onlara əngəl törətməməyi tapşırıb. Amma min bir zəhmətlə tikilən, xeyli sayda insanın iş yeri olan restoranların sənədsiz torpaqda tikildiyi bir neçə il sonra yada düşüb və dağıdılıb, kompromis variant seçilməyib.
Qeyd edək ki, mediada yayılmış məlumata görə, iki ay öncə Baş prokuror yanında Korrupsiyaya Qarşı Mübarizə Baş İdarəsi tərəfindən araşdırma başlayıb. Məlum olub ki, obyektlərin yerləşdiyi kafe və yanacaqdoldurma məntəqəsinin torpaq sahəsinin sənədləri qanunsuz olub.

Təxminən bir ay öncə Korrupsiya İdarəsi tərəfindən magistral yolun üzərində yerləşən “Hacıoğlu”, “Ulduz”, “Cız-bız”, “Masallı” restoranları və yanacaqdoldurma məntəqəsinin fəaliyyəti dayandırılıb. Magistral yoldan bu obyektlərə girişi təmin edən yol da bağlanılıb.
“Hacıoğlu” restoranı bələdiyyənin balansında olan torpaq sahəsində tikilib, “Ulduz” kafesinin yerləşdiyi torpaq sahəsi isə əvvəllər Meşə təsərrüfatının balansında olub. Sonra isə 3 saylı Ekologiya və Təbii Sərvətlər İdarəsinin hesabına keçib, daha sonra isə Əmlak Komitəsi həmin ərazini dövlət torpağı kimi balansına keçirib. Sahibkar isə Əmlak Komitəsi ilə müqavilə imzalayaraq torpağa dair alqı-satqı edib.

“Cız-bız” restoranın yerləşdiyi ərazi Xələc kənd bələdiyyəsinin balansında olub. 2006-cı ildə isə kənd sakini Yudif Nəzirova satılıb və onun şəxsi mülkiyyətinə keçib.