Sabirabad rayon Prokuroru Fəxrəddin Pənahov Bakının Qaradağ rayonunda prokuror işlədiyi dövrdə xidmətdən kənar işlər görməkdə, polis əməkdaşını öz qanunsuz əməllərinə alət etməkdə ittiham olunur. Reportyor.info xəbər verir ki, bu haqda şikayətçi olan sabiq polis əməkdaşı Həbib Məmmədov özü bildirib. Onun sözlərinə görə, polisdə işini itirmək qorxusuna görə bəzi qanunsuz işləri boynuna alıb və nəticədə saxlanılıb. Prokuror F. Pənahov isə ona şikayətləri geri çəkdikdən sonra işlə təmin edəcəyinə söz verib. Amma F. Pənahov vədinə xilaf çıxıb. Keçmiş polis işçisi bildirir ki, prokuror onun həyatını rəsmən cəhənnəmə döndərib: “15 il polisdə qüsursuz xidmət göstərmişəm. Fəxrəddin Pənahov həyatımı alt-üst elədi. 2014-cü ildə qanunsuz əməllərini üstümə götürməyə məni məcbur etdi. Məni hədə-qorxu ilə bu vəziyyətə salıb. Mən də inanmışam, bir az da qorxmuşam. Məsələ. Elə olub – məni Qaradağ rayon prokurorluğunda posta təyin etmişdilər. Fəxrəddin Pənahovun xidmətdən kənar işləri olan daş karxanalardan pul yığmağa, pul olmayanda aqlay götürməyə gedirdim, ona sürücülük edirdim, evinin təmirinə baxırdım. Bu işləri onun üçün mən görürdüm. Daxili İşlər Nazirliyinin Daxili Təhqiqat şöbəsi şikayət əsasında məni saxladı. Şikayət Prokurordan idi. Dedilər ki, necə olubsa danış. Amma Fəxrəddin Pənahov məni qorxutdu və boynuma götürdüm. Nəticədə məni polis, sıralarından uzaqlaşdırdılar”.
H. Məmmədov deyir ki, ondan sonra Pənahov onu saymayıb:”Özünü elə apardı ki, heç xəbəri olmayıb, məni özündən uzaqlaşdırdı. 2016-cı ildə Baş Prokurorluğa şikayət ərizəsi verdim. Məni çağırdılar və təşkilat- analitik şöbəsində istintaq işinə başladılar. Bir müddət sonra Fəxrəddin Pənahov və yaxınları zəng etdilər ki, şikayəti geri götür, səni işlə təmin edək. Bir də “Niva” markalı maşınımı əlimdən almışdılar. Amma razılaşmadım və iş Korrupsiya Baş Mübarizə İdarəsinə verildi. Onun qohumları hər gün zəng edirdi, sonra 3 dəfə özü ilə görüşdük. Dedi ki, bu şikayətlərim vəzifəyə getməyimə mane olur. Ərizəni götür, vəzifəyə gedim, sənə iş söz verirəm. Mən də yenə inandım, şikayəti geri götürdüm və 2020-ci ildə Sabirabad rayon prokuroru təyin olundu, bir az sonra onu təbrik elədim. İşimdən söz salanda isə məni təhqir etməyə başladı, dedi ki, kimə istəsən get şikayət elə. Mən Prezidentə, Mehriban xanıma, Baş Prokurora müraciət etmişəm. Axırda prokurorluq çağırdı, izahat aldılar. Cavab verdilər ki, şiddətli töhmət alıb. Amma necə rayon prokuroru işləyə bilər? İndi heç bir tədbir görülmür. Mən indi xəstə canımla uşaqlarımla kirayədə qalıram. Mən heç bir tələb irəli sürmürəm, o vaxt Pənahovun qanunsuz hərəkətlərini boynuma götürmüşəm, özü vəzifədədir, mənsə işsiz qalmışam. Mən uşaqları imkansızlıqdan məktəbə göndərə bilmirəm. Sadəcə, Prezidentdən xahiş edirəm ki, işə təmin olunmaqda kömək edəsiniz. Fəxrəddin Pənahov da bilsin ki, dediklərim həqiqətdir, məni bu vəziyyətə salmısınız, hər şeyim əlimdən çıxıb”.
