Bir neçə gün əvvəl Reportyor.info-da “SAB-ın kolbasasından metal çıxdı” başlıqlı yazı dərc olunmuşdu. Müştəri qeyd edirdi ki, şirkətin məhsulunda dəmir parça aşkarlayıb. Bununla bağlı “SAB” firması əməkdaşımızı müəssisəyə dəvət edib və yerindəcə araşdırma aparmışıq, istehsalat prosesinə baxış keçirmişik.
Məlum oldu ki, ittihamlar həqiqəti əks etdirmir, müştərinin şikayəti əsassızdır. Müşahidələrimizə əsasən deyə bilərik ki, “SAB” şirkəti yüksək keyfiyyətli ət və süd istehsalını, eləcə də emalını həyata keçirir.
Xırdalanda yerləşən zavod ən müasir avadanlıqlı istehsal sahələri, laboratoriyalar, anbarlar və daşınma sistemləri ilə təchiz olunub. İstehsal demək olar ki, tam avtomatlaşdırılıb və prosesə daxil olan avadanlıqlar Almaniya, İtaliya və Polşadan gətirilib.
Ona görə tam şəffaf, keyfiyyətli iş ortaya qoyulur. Şirkətdən bildirildi ki, onların məhsulundan hansısa yad cismin çıxması mümkün deyil, bütün istehsal prosesinə ciddi nəzarət olunur.
Həmçinin, deyildi ki, şirkətin rəhbərliyindən sıravi işçisinə qədər hamı “SAB” məhsullarının dadına baxır, ailəsinə aparır. Ən əsası isə daim istehlakçıların sağlamlığını və damaq dadını ön planda tutaraq “özümüzə rəva bilmədiyimiz məhsulu müştəriyə satmamaq” düsturundan kənara çıxmayıb.
