“Yanan obyektlərin heç biri “Sədərək” ticarət mərkəzinə aid deyil”.
Bunu “Qafqazinfo”ya açıqlamasında “Sədərək” Ticarət Mərkəzinin mətbuat katibi Kəmaləddin Qədim deyib.
O bildirib ki, ərazi olaraq “Sədərək” adlansa da, mağazaların heç birinin ticarət mərkəzinə aidiyyəti yoxdur: “Hər biri icarəyə verilmiş obyektlərdir. Burada banklar, karqo şirkətləri və yanacaqdoldurma məntəqələri də var. Ancaq bizə aid deyil. “Sədərək” Ticarət Mərkəzinə heç bir zərər dəyməyib”.
K.Qədim sığorta məsələsinə də aydınlıq gətirib: “Sahibkarlarla müqavilə bağlandıqda ilkin vacib şərtlərimizdən biri sığortanın olmasıdır. Düzdür, zamanında sığorta şirkətləri ilə sahibkarlar arasında müəyyən narazılıqlar olub. Yanğın, subasma halları baş verdiyi zaman sığoprta şirkətləri onlara dəymiş zərəri ödəməyiblər. Amma biz sığortanın burada işləməsinin marağındayıq. Bu məsələ hər zaman bizim gündəmimizdədir. Sahibkarlardan bunu tələb edirik ki, öz məhsullarını sığortalasınlar”.
Xatırladaq ki, ötən gün həmin ərazidəki anbarlarda baş verən yanğının söndürülməsi məqsədilə əraziyə FHN-in 30-a yaxın xüsusi təyinatlı texnikası və 140 nəfərə yaxın şəxsi heyəti cəlb olunub, artıq yanğın məhdudlaşdırılıb.
