Rusiya Fövqəladə Hallar Nazirliyi Xankəndində 10 noyabr sənədinin mahiyyətinə zidd addım ataraq, separatçı rejimlə şərik işlər həyata keçirdiyi bir zamanda Azərbaycanın Fövqəladə Hallar Nazirliyinə rəhbərlik edən Kəmaləddin Heydərovun baş ərəb milyonçulara qarışıb.
“Fövqəlnazir” Rusiya FHN-ə məktub yazaraq 10 noyabr bəyanatının ruhuna qarşı addımlar atılmasını xatırlatmalı olduğu halda ərəb ovçularının Azərbaycanın flora-faunasına düşmən kəsilməsinə tamaşa edib.
Anaxeber.info yada salır ki, Qaxda nadir quşları ovlayan ərəblərin yüngülvari cərimə olunmasıyla ört-basdır edilməsi üçün dəridən-qabıqdan çıxsalar da, ortada bir mərəkə qopduğu görünməkdədir.
Və bu hadisənin Azərbaycanın imicinə vurduğu zərbəni, onun siyasi rəhbərliyinin xoşuna gəlməməsini (Prezident İlham Əliyev məmur harınlığını həmişə pisləyib – red) nəzərə alsaq, ərəbləri bu yerə buraxanlar, gətirənlər, onlara şərait yaradanlar gec-tez cəzalanacaqlar.
Əlbəttə ki, KİV-dən həmişə gen gəzən K.Heydərovu da ərəblərlə bağlı açıqlama verməyə vadar edən məhz elə yuxarı dediyimiz situasiyadır. FHN rəhbərinin ərəblərin gəlişində əhəmiyyətli rolunun olması siyasi rəhbərliyə ciddi şəkildə məruzə olunsa, onsuz da vəziyyəti qənaətbəxş olmayan naziri çox çətin sınaq gözləyəcək.
K.Heydərov açıqlama verib ki, Azərbaycanda qanunsuz ovla məşğul olduğu deyilən ərəblərlə hər hansı tanışlığı yoxdur, onları tanımır, bu, haqqında yazılan növbəti uydurma xəbərlərdən biridir.
Lakin bu açıqlamadan çox keçmir, jurnalist Cavanşir Həsənli Acınohur ərazisində qanunsuz ov edən həmin ərəblərlə K.Heydərovun illər əvvəl çəkdirdiyi fotoları paylaşır. Paaart!!! Bununla da gündəmə bomba düşür. Və qarşı tərəfin “tükü tərpənmir”.
Elə ona görə Ekologiya və Təbii Sərvətlər Nazirliyi açıqlamasında məsuliyyəti daşımadığını, ərəblərin ölkəmizə necə gəlməsi, kimlərin buna şərait yaratmasında onun rolu olmadığını israrla qeyd edirdi. ETSN sətiraltı eyham vururdu ki, bizlik deyil, ərəbləri nadir quşların canına urcah edən güc kifayət qədər qüdrətli və fövqəlqüvvədir…
