Astara rayon Hamoşam kənd bələdiyyəsinə namizədliyini verən Rüfət Əliyev seçiciləri olan həmkəndlilərinə müraciət edib. Reportyor.info müraciəti təqdim edir:
Əziz həmkəndlilər!. Bütün ölkədə olduğu kimi, Hamoşamda da bələdiyyə icra hakimiyyətindən asılı haldadır. Yəni , bələdiyyə faktiki olaraq özünün funksiyası olan, yerli özünüidarəetmə funksiyasını icra etmir, icra hakimiyyətinin qeyri rəsmi orqanı olaraq fəaliyyət göstərir.
Bələdiyyə hesabatları icra hakimiyyətinə verir, tapşırıqları icra hakimiyyətinədən alır. Əgər etimad göstərib, məni bələdiyyə üzvü (sədri) seçərsizsə, ilk olaraq bələdiyyənin yerli özünüidarəetmə funksiyasını özünə qaytarmaq üçün, əlimizdən gələni edərik.
Yəni mən İH tapşırığı ilə işləmərəm, hesabatları İcra Hakimiyyətinə yox, sizə verərəm. Qərarları sizin də iştirakınızla etimad göstərib seçəcəyiniz digər bələdiyyə üzvləri ilə birgə verib, birgə icra edərik.
İndiyə qədər belə olub ki, bələdiyyə üzvləri özlərinə sədr seçib, bələdiyyə adı ilə bütün qərarları da sədr verib. Əgər etimad göstərərsinizsə, bələdiyyənin sədr asılığı da olmayacaq.
Qərarları “Bələdiyyənin statusu haqqında Azərbaycan Respublikasının qanuna” uyğun olaraq, ayda bir dəfə toplaşan, bələdiyyə məclisləri verəcək.
Sessiya arası dövrdə məclisin verdiyi səlahiyyətə uyğun olaraq, üzvlərin biri və ya sədr qərarların icrasına məhsul olacaq. Eyni zamanda bələdiyyəmizin spesifik problemi də var. Bələdiyyənin mənzil qərargahı yoxdur.
İcra nümayəndəliyinin ofisində bir seyf, bir masa üzərində fəaliyyət göstərir. Bu da bələdiyyənin yerli özünüidarəetmə funksiyasına uyğun deyil.
Əgər etimad göstərərsinizsə, ilk işlərimizdən biri də bələdiyyənin mənzil qərargahının tikilməsi olacaq. Düzdür dəbdəbəli saray tikmək fikrim yoxdur, bələdiyyənin imkanları daxilində kiçik də olsa bir qərargah tikəcəyik.
