“Siyahı ilə yaxından tanış oldum və vurğulayım ki, real mənzərə yaradır. Artıq dəfələrlə seçki öncəsi belə siyahılar paylaşılıb və son nəticədə bəlli olub ki, informasiyalar doğru imiş”.
Bu sözləri Yenisabah.az-a siyasi şərhçi Azər Rəşidoğlu Milli Şuranın sədri Cəmil Həsənlinin yaydığı 9 fevral seçkilərinin nəticələrini əks etdirən siyahıya münasibət bildirərkən deyib. Onun sözlərinə görə, ilk baxışdan, bunu proqnoz kimi qiymətləndirmək və hansı namizədin daha yüksək reytinqə malik olduğunu üzə çıxartmaq olar.
“Lakin seçki təşviqatı sübut edir ki, köhnə namizədlərin əksəriyyəti vətəndaşlar tərəfindən qəzəblə qarşılanır. Uzun illər parlamentdə oturan və bircə dəfə də çıxış etməyən simaların yenidən deputat almasını insanlar istəmir. Kimlərsə seçkiyə müdaxilə etməklə özünü buraxmış deputatları yenidən Milli Məclisə qaytarmaq istəyir və bu, ilk növbədə Prezident Əliyevə xəyanətdir.
Düşünürəm ki, ölkə başçısı bu siyahıya münasibət bildirməli və qarşıdan gələn seçkilərin demokratikliyini təmin etməlidir. Əgər 10 fevralda həmin siyahı öz təsdiqini tapsa, Azərbaycan bu ləkədən xilas ola bilməyəcək”, – deyə Azər Rəşidoğlu bildirib.
Bəzi iddialara görə, məlum siyahının hakimiyyətdəki bəzi güclər tərəfindən Milli Şuraya ötürülüb. Hətta bir qədər uzağa gedib konkret olaraq Azərbaycan Milli Elmlər Akademiyasının prezidenti Ramiz Mehdiyevin adını çəkənlər də. Ramiz Mehdiyev uzun müddət Prezident Admnistrasiyaının rəhbəri vəzifəsində çalışıb və siyasi proseslərə yön verən fiqur kimi tanınıb. İndisə o, siyasi post tutmur. Bu halda “siyahı qalmaqalında” onun adının çəkilməsini əsassız hesab edənlər də var. Onların fikrincə, Ramiz Mehdiyevin siyasi proseslərə təsir imkanları ya çox azdır, ya da ümumiyyətlə yoxdur.
Azər Rəşidoğlu isə belə düşünmür: “Ramiz Mehdiyev anadan siyasətçi doğulan şəxsdir. Ən çətin dövrlərdə belə o, heç bir post tutmasa da siyasi proseslərə yön verə bilib. İndi də cənab Mehdiyev Təhlükəsizlik Şurasının üzvü, Akademiyanın prezidentidir. Onun ölkədə çoxsaylı heyranları var və Azərbaycan siyasətinin ən önəmli siması olaraq qalmaqdadır. Bu baxımdan, düşünürəm ki, Mehdiyevin siyasi proseslərə təsir imkanları hələ də qalır”.
Siyası şərhçi “siyahı qalmaqalında” Milli Şura ilə hakimiyyətdəki maraqlı güclər arasında əlaqələrin axtarılmasına da münasibət bildirib. “Azərbaycanda siyasi sistemi müxalifət və iqtidara bölməzdim. Belə təsnifat bizdə işləmir. İqtidar və müxalifətdə təkamül yolu təklif edənlər və köhnəlmiş sistemi qorumaq istəyənlər var. 21-ci əsrdə köhnə sistem işləmir və dəyişiklik qaçılmazdır. Bu baxımdan, hakimiyyət dəhlizlərinə yeni nəfəs gəlməsini alqışlayır və bunun davam etməsini istəyirəm.
Dəyişən yalnız şəxslər deyil, idarəetmə metodları da olmalıdır. Sosial şəbəkələrdə yazılan statusları pozdurmaq prosesləri dalana dirəmək niyyətindən xəbər verir. Bu metod işləmir. İnanmaq istərdim ki. Parlament seçkilərində də xeyli sayda intellektual və yeni insanlar təmsil olunacaq. Əks halda Milli Məclisin buraxılması önəmini itirəcək. Ölkənin imici təhlükə altındadır. Hamılıqla islahatlara dəstək verməli və seçki prosesinin demokratikliyinə çalışmalıyıq, – deyə o vurğulayıb.
