Qazaxıstan Azərbaycanla öz neftinin nəqlinin mümkün yollarını müzakirə edir.
“APA-Economics”in verdiyi xəbərə görə, bu barədə cümə axşamı keçirilən brifinqdə Qazaxıstanın “KazMunayQaz” (KMG) milli şirkətinin idarə heyətinin iqtisadiyyat və maliyyə üzrə müavini Dauren Karabayev məlumat verib.
“Qazaxıstan neftinin mümkün nəqli üçün Azərbaycan tərəfi ilə müxtəlif səviyyələrdə, o cümlədən dövlət və milli şirkətlər səviyyəsində müzakirələr aparılır. Təfərrüatlar hələ də razılaşdırılmalıdır. Azərbaycan tərəfi ilə razılıq əldə edildikdən sonra daha ətraflı məlumat verəcəyik”, – Dauren Karabayev qeyd edib.
O xatırladıb ki, Azərbaycanın iki neft kəməri – Bakı-Tbilisi-Ceyhan və Bakı-Supsa, potensial olaraq Qazaxıstan neftinin nəqli üçün istifadə oluna bilər.
Xatırladaq ki, “Reuters“in 12 avqust tarixində verdiyi məlumata görə, Qazaxıstan öz neftinin bir hissəsini – gündə təqribən 100 min barel və ya Xəzər Boru Kəməri Konsorsiumu (CPC) vasitəsilə nəql olunan həcmin 8%-ni Rusiyadan yan keçməklə Azərbaycanın boru kəmərləri ilə tədarük edib satmaq niyyətindədir.
Qeyd olunub ki, 20 il ərzində Qazaxıstandan neft Xəzər Boru Kəməri Konsorsiumunun kəməri vasitəsilə Novorossiysk limanına tədarük olunub. Bununla belə, iyul ayında Rusiya məhkəməsi neft sızmalarına qarşı mübarizə və ekoloji təhlükəsizlik planının pozulması səbəbindən CPC-nin fəaliyyətini 30 gün müddətinə dayandırdıqdan sonra Qazaxıstan alternativ yollar axtarmağa başlayıb.
Agentliyin istinad etdiyi mənbə bildirib ki, Qazaxıstanın “KazMunayQaz” milli şirkəti artıq SOCAR-la neft tədarükü ilə bağlı ilkin danışıqlar aparır. Qazaxıstan tərəfi Bakı-Tbilisi-Ceyhan (BTC) boru kəməri ilə ildə 1,5 mln. ton yanacaq satmağı planlaşdırır. Beləliklə, Qazaxıstan BTC vasitəsi ilə gündəlik 30 min bareldən bir qədər çox neft sata biləcək.
Tərəflər arasında neft ixracına dair razılaşmanın avqust ayının sonunda imzalanması, tədarükə payızda başlanması gözlənilir.
Bununla yanaşı, Qazaxıstan 2023-cü ildən etibarən Azərbaycanın digər kəməri – Bakı-Supsa ilə ildə 3.5 milyon barel neft ixrac etmək niyyətindədir.
