Qardaşına əsəbiləşərək polisə yalan məlumat verən şəxs məsuliyyətə cəlb edilib.
Reportyor.info“Qafqazinfo”ya istinadla xəbər verir ki, hadisə sentyabrın 22-si Lənkəranda baş verib.
Belə ki, gecə saatlarında rayon sakini R.Qənbərov polisə müraciət edərək özünə məxsus “VAZ 2106” markalı avtomobilin qaçırıldığını bildirib. Müraciət əsasında polis əməkdaşları tərəfindən aparılan araşdırmalar zamanı maraqlı məqamlar üzə çıxıb.
Məlum olub ki, o yaşadığı evin həyətində saxladığı avtomobilinin qardaşı tərəfindən idarə olunduğu zaman arxa buferinin əzildiyini öyrənib. Qardaşı avtomobili qısa zamanda təmir etdirəcəyini bildirsə də, sonradan tərəflər razılığa gələ bilməyiblər.
Bundan hiddətlənən R.Qənbərov polisə müraciət edərək avtomobilinin başqa şəxs tərəfindən qaçırılması barədə bilərəkdən yalan məlumat verib.
Hazırda faktla bağlı Lənkəran Şəhər Rayon Polis Şöbəsində araşdırma aparılır.
