“Qarabağ”ın qələbəsinə sevinən sürücü avtoxulqanlıq etdiyi üçün həbs olunub.
Qaynarinfo-nun məlumatına görə, hadisə Gəncə şəhərində baş verib.
Belə ki, “Mercedes Benz 300” markalı avtomobilin sürücüsü F.R. Gəncə şəhərində avtoxuliqanlıq etdiyi üçün saxlanılıb. Onun barəsində İnzibati Xətalar Məcəlləsinin (İXM) 511.1.3-cü maddəsi ilə protokol tərtib edilib və işə məhkəmədə baxılıb.
F.R. məhkəmədə əməlini etiraf edərək bildirib ki, futbol həvəskarıdır və “Qarabağ”ın qələbəsinə sevindiyi üçün sevincindən avtoxuliqanlıq hərəkətləri edib. O, əməlindən peşman olduğunu bildirib. F.R. məhkəmədən barəsində yüngül inzibati tənbeh tətbiq edilməsini xahiş edib.
Məhkəmənin hökmü ilə təqsirləndirilən şəxsin nəqliyyat vasitələrini idarə etmək hüququ 1 il müddətə məhdudlaşdırılmaqla, 15 gün müddətinə həbs edilib.
