Nəsimi rayonundakı 1 saylı Körpələr Evindən uşaqlar üçün olan əşya və ərzağın oğurlandığı iddia edilən görüntülərlə bağlı Baş Prokurorluğa göndərilən sorğumuz hələ də cavablandırılmayıb.
Axar.az xəbər verir ki, müğənni Rəqsanə İsmayılovanın qızı Aysun İsmayılovanın oğurluq iddiası ilə çəkib yaydığı videolarla bağlı 4 may tarixindən Baş Prokurorluğa rəsmi sorğu göndərilib. A.İsmayılovanın şəxsi səhifəsində videoları paylaşmasından 7, redaksiyanın həmin məsələ ilə əlaqədar Baş Prokurorluğa sorğu göndərməsindən artıq 4 gün keçib. Buna baxmayaraq, Baş Prokurorluğun mətbuat xidməti nə şifahi, nə də yazılı sorğuya cavab verib.
Daxili İşlər Nazirliyindən isə sorğumuza dərhal cavab verilib və bildirilib ki, yayılan görüntülərdə vəzifəli şəxsin səlahiyyətlərindən sui-istifadə halı olduğu iddia edildiyi üçün məsələ prokurorluq tərəfindən araşdırılmalıdır.
Videolardan da göründüyü kimi, körpələr evindən çıxarılan əşyalar baş həkim N.Əliyevanın olduğu iddia edilən avtomobilə yüklənərək aparılır.
Səhiyyə Nazirliyinin mətbuat xidmətinin mütəxəssisi Səfayə Əhmədova 1 saylı Körpələr Evi ilə bağlı yayılan görüntülərə münasibət bildirərkən videonun təhrif olunmuş formada təqdim edildiyini bildirmişdi. Nazirlik sözçüsü qeyd etmişdi ki, məsələ ilə bağlı Səhiyyə Nazirliyində (Səhiyyə Nazirliyi – hüquq-mühafizə orqanı deyil!) araşdırma aparılıb və o nəticəyə gəlinib ki, videoda körpələr evindən ərzaq deyil, istifadə olunmuş yataq dəstləri yuyulması üçün maşına yüklənilib, uşaq bezləri isə dəyişdirilməsi üçün körpələr evindən aparılıb.
Bu açıqlamanın ardınca isə Rəqsanə İsmayılovanın qızı Aysun daha bir video yayaraq, ərzaqların da daşındığını görüntüləmiş və iddiasında haqlı olduğunu sübut etməyə cəhd göstərmişdi. Daha sonra isə 1 saylı Körpələr Evində baş verən özbaşınalıq və uşaqları himayəyə götürmək istəyən insanlardan baş həkim N.Əliyevanın külli miqdarda rüşvət istəməsi ilə bağlı yazışmalar yayılmışdı.
