Son günlər gündəmi zəbt edən mövzulardan biri də Göyçay çayı üzərində olan körpünün uçmasıdır. Məsələ ilə bağlı rayon sakinləri Criminal.az saytına məktub yollayıblar. Məktubdan belə aydın olur ki, iyunun 2-də sel yağması bir çox məmurlaırn işinə yarayıb.

Məktubda deyilir: İlk olaraq körpünün tikilmək tarixinə baxaq. Tamamilə uçan körpü 1945-ci ildə alman əsirləri tərəfindən tikilib. Həmin vaxtlarda demək olar ki, maşın olmadığına görə körpü piyadalar, at – araba üçün nəzərdə tutulub. Körpünün eni 1 metrdir. Körpü istifadəyə veriləndən illər sonra maşınların sayı artıb və həmin körpüdən də nəqliyyatın gediş-gəlişi üçün istifadə olunub. Get-gedə maşınların sayının artması, iri tonajlı maşınların çoxalması bu körpüdən istifadəni çətinləşdirib.

2003-ci ildə həmin körpünün yerində təzə körpü istifadəyə verildi. Hər şey öz axarı ilə gedirdi. Əvvəli musiqiçi olduğuna görə qazancı toylarla çıxan Şamaxının deputatı, Göyçaydan olan Elxan Süleymanov fövqəladə hallar naziri Kamaləddin Heydərovun sayəsində ulduzu parlamağa başladı. Bu iki şəxsi birləşdirən tellər “fövqəlnazir”in musiqi ilə məşğul olmasıdır.

Nazirə qoşulan E.Süleymanov onun biznesi ilə məşğul olmağa başladı. Qısa zamanda güclü var-dövlətə yiyələnən keçmiş musiqiçi əmlak kralına çevrilməyə başladı. İlk olaraq Göyçay H.Əliyev fondu tərəfindən himayə olunan internat məktəbin həyətinin bir hissəsin alaraq 20-dən yuxarı mağaza tikdirdi. Bununla bərabər o vaxtlar Göyçayın kurartoru sayılan Ziya Məmmədovun köməkliyi sayəsində, xalası oğlu olan İcra Hakimiyyətinin başcısı, indi isə Ucar Rayon İcra Hakimiyyətinin başcısı M.Məmmədovun köməkliyi sayəsidə çayın tən ortasından hektarlarla torpaq aldı.

Ziya Məmmədovla yaxın olmasının digər sübutu onların İsmayıllı rayonunun Buynuz kəndində villalarının qonşu olması və həmin villalarda qurulan kef məclislərində birlikdə iştirak etmələridir. İlk olaraq zəbt olunmuş Göyçay çayın suyun qurutmaq və məcarasın dəyişmək üçün 1000-lə “Kamaz” torpaq töküldü. Bundan sonra özü və gələn qonaqlarının istirahəti üçün meyvə bağları salınaraq 10 yaxın villa tikdirdi. Deputat çay qırağı ərazidə bostan bitkiləri əkən əhalinində torpağın zəbt edərək öz ərazisini daha da genişləndirdi. Həmin vaxt ondan şikayət olunsa da, baxan olmadı. Bu gedişlə Göyçay ərazisində böyük obyektlər və quşçuluq ferması açaraq var-dövlətini daha da genişləndirdi.

Elxan Süleymanovun Göyçay sahilindəki villaları

Artıq bu işlər onun üçün xırda sayıldığından Qəbələ rayonunda 2 çınqıl karxanası açdı və Göyçaylı sahibkarların mülkünə göz dikməyə başladı. Rayonda fəaliyyət göstərən daş karxanalarını və A.T.F. adlı zavodu ələ keçirmək üçün karxanaları bağlatdı. Ona görə ki, bu karxanalar onun işinə mane olurdu. Onun Qəbələdəki karxanalarından çınqılı getmirdi. İndi isə onun işi yağ kimi gedir. Rayonda karxanalar işləyən vaxt 30-40 manata olan çınqıl bu gün 150 manata, 70-80 manat olan qum 300 manata qədər bahalaşıb.

Diqqətlə nəzər yetirilsə görərsiniz ki, karxanalar bağlanandan sonra E.Süleymanov öz inadından əl çəkməyərək A.T F. şirkətlər qrupundan onların fəaliyyətləri haqqında Baş Prokurorluğa, ölkə prezidentinə və digər qurumlara ardı- arası kəsilmədən şikayət etməyə başaldı. Bu Azərbaycan tarixində tayı-bərabəri olmayan hadisə idi. Deputat sahibkarlardan şikayət edir.

Elxan Süleymanov

ATF şirkəti nəinki Göyçayda, hətta Azərbaycanda tanınmış şirkətlərdən biridir. Artıq 20 ilə yaxındır ki, bunlar yol çəkilmə tenderlərinin qalibi olublar. Zavodda 200-dən yuxarı texnika və 500-ə yaxın işçi çalışır. Zavod işçilərini hər bir şəraitlə hətta gündəlik iki dəfə yeməklə təmin edir və dəfələrlə dövlət tərəfindən mükafatlar alıb və regionda ən böyük vergi ödəyicisidir. Sahibkarlığın və regionların inkişafı haqda fərmanlara uyğun olaraq bu yaxınlarda Balakən rayonunda yeni zavod istifadəyə verib.

İyunun 2-də yağan leysan yağışlar Elxan Süleymanovun işinə yarayıb. Göyçay çayının üstündə olan körpünün uçması onun üçün toy-bayrama çevrildi. Halbuki, həmin körpünün uçmasının bu karxanalara heç bir aidiyyatı yoxdur. Karxanalar körpüdən demək olar ki, 10 km məsafədə yerləşir.

Diqqətlə uçan körpüyə baxsanız, görərsiniz ki, körpünün tağımları uçmayıb, körpü ilə yol arasında torpaq sahəsi uçub. Bunun da səbəbi həmin ərazidə beton lövhələrin yaxşı quraşdırılmaması olub ki, su torpağın alt hissəsini yuyaraq 7 metr ərazini uçurub. Bu səbəblərdən biridir.

Digər ən mühüm səbəblərdən biri də Elxan Süleymanovun Göyçay çayının başlancığın götürdüyü Qəbələ rayonunda çınqıl karxanaları, o və onun Göyçay çay qırağı əraziləri zəbt edib hasarlaması və suyun axarının dəyişməsi, bir istiqamətə axmasıdır. Bütün bunlar azmış kimi körpü uçandan bir neçə gün sonra “Azəravtoyol”un rəhbərliyi çıxış edərək bildirdi ki, yeni körpü tikilməyəcək, uçan 7 metr torpaq sahəsi beton lövhələrlə bərkidilərək körpüyə birləşdiriləcək. Bu da elə bir xərc tələb eləmir. Bəs nə oldu birdən-birə tuthatut başaldı? 10 karxananın müdürü ATF şirkətinin rəhbərliyi həbs edildi? Halbuki, həmin karxanalar rayon İcra Hakimiyyətinin, FHN-in, Ekologiya və Təbii Sərvətlər Nazirliyinin icazəsi və lisenziyası əsasında fəaliyyət göstəriblər.

Elxan Süleymanovun və onun havadarlarının işə qarışması işləri tamam başqa məcaraya yönəltdi. Bu karxanaları və zavodu ələ keçirmək istəyən qüvvələr ölkə prezidentini aldadaraq inandırdılar ki, bəs Göyçay viran qalıb əhali bu karxanaların fəaliyyətindən bezib, təcili tədbirlər görülməsə güclü narazılıqlar olacaq. Onlar bir gülləyə iki dovşan vurdular. Həm karxanaları bağlatdırıb rəhbərlərini həbs etdirdilər, həm də 1945-ci illərdə alman əsirləri tərəfindən əhalinin gediş-gəlişi üçün tikilən və sel nəticəsində uçan körpünü göstərib dövlətdən körpünü bərpa etmək üçün 3.5 milyon manat ayrılmasına nail oldular. Halbuki, həmin uçan körpü keçən əsrin sonunda bağlanmış və əhali sonradan maşın yolu üçün tikilən və əhali üçün nəzərdə tutulan hissəsindən istifadə edirdi.

Görəsən heç bir tərəfi uçmayan təzə körpü ilə asfaltı birləşdirən 7 metrəsi uçan torpaq yolun tikintisinə 3.5 milyon vəsaitmi lazımdır? Biz göyçaylılar ölkə prezidentindən xahiş edirik ki, Süleymanov Elxanın fəaliyyətini araşdırmaq üçün komisiya yaradılmasına göstəriş versin. Bu komisiya araşdırsın ki, görək onun bu qədər var-dövləti hardandır? Ona kim səlahiyyət verib ki, Göyçay çayının ərazisini zəbt edib villalar tikdirsin? Onun Qəbələ rayonunda Göyçay çayının başlancığında tikdirdiyi 2 çınqıl karxanasının fəaliyyəti araşdırılsın.

Göyçay rayon İcra Hakimiyyətinin başçısı Mehdi Səlimzadə

Süleymanov Elxan Göyçay İcra Hakimiyyətinin başcısı Mehdi Səlimzadə ilə keçən il qohum olublar. Bacısı qızını başcının qardaşı oğluna verib. Başcının oğlu Baş Prokurorluqda Korrupsiya İdarəsində yüksək vəzifədə işləyir, generaldır.

Criminal.az saytının əldə etdiyi məlumata görə, rəhbərləri cinayət məsuliyyətinə cəlb edilən şirkətlər Ziya Məmmədova məxsusdur. Lakin həmin ərazidə baş nazirin sabiq müavini Abid Şərifovun da xeyli qum-çınqıl karxanası var.