Ermənistan baş nazirinin müavini Tiqran Avenyan ölkənin sentyabrın 16-da vəzifəsindən istefa verən sabiq təhlükəsizlik xidmətinin rəisi Artur Vanetsyanın son açıqlamalarına münasibət bnildirib.
Reportyor.info xəbər verir ki, Ermənistan mətbuatına danışan T.Avenyan sabiq təhlükəsizlik şefinin hərəkətlərinin nəinki zabitə, heç sıravi əsgərə də yaraşmadığını bildirib.
Xatırladaq ki, vəzifəsindən öz ərizəsi ilə istefa verən Vanetsyan Paşinyanı dolayısı ilə səriştəsizlikdə və bacarıqsızlıqda ittiham etmişdi. Paşinyan isə Los-Ancelosda keçirdiyi mətbuat konfransında xidmət rəisinin hərəkətlərini şərh edərkən, “belə davranan zabit paqonlarını zibil qabına atır” demişdi.
Vanetsyan da cavabında “zaman kimin və nəyin zibillikdə olduğunu göstərəcək” demişdi və bildiyi şeyləri açıqlayacağı təqdirdə bunun ağır nəticələr verəcəyinə dair xəbərdarlıq etmişdi.
Paşinyanla sabiq təhlükəsizlik rəisi arasında getdikcə qızışan qarşıdurmanın Ermənistanın siyasi gündəmində əsas hadisələrdən birinə çevrildiyi dönəmdə baş nazirin müavini də bu polemikya qoşularaq, Paşinyanı müdafiə etməyə çalışıb.
Avenyan deyib ki, sabiq rəisin davranışları ilə zabit şərəfi qətiyyən bir çərçivəyə sığmır. “O, bu cür getməli deyildi” deyən Avenyan baş nazirlə sabiq təhlükəsizlik rəisi arasında ikinci vəzifədə olarkən şəxsi münasibətlər və vəzifə müstəvisində konflikt olduğunu da etiraf edib.
Bununla yanaşı, Vanetsyanın Paşinyanın onun yanına adam göndərərək, bir müddət susmasını xahiş etdiyinə dair sözlərinə şərh verən Avenyan sabiq rəisin yalan danışdığını iddia edib. Vanetsyanın açıqlamalarını təəssüflə izlədiyini deyən baş nazirin müavini bu mövzunun tezliklə qapanmasında maraqlı olduqlarını da gizlətməyib. Lakin yerli ekspertlər bu konfliktin hələ davam edəcəyini və daha da qızışacağını proqnozlaşdırırlar.
Discussion about this post