Ermənistan Baş nazirinin həyat yoldaşı Anna Akopyan Azərbaycanın Birinci vitse-prezidenti Mehriban Əliyevanı Azərbaycanın işğal edilmiş Qarabağ bölgəsinə “dəvət edib”.
Axar.az xəbər verir ki, bunu Akopyan “BMT Təhlükəsizlik Şurası Qadınlar, Sülh və Təhlükəsizlik” konfransında çıxışı zamanı deyib.
Özünü “ledi” kimi aparmaq istəyən Akopyan Mehriban xanım Əliyevanın “Qarabağda muğam səslənməsi” istəyini “cavablandırdığını” düşünüb:
“O, bizim qonağımız ola bilər. Ermənilər qonaqları necə qəbul edib, hörmət bəsləməyi bilir. Bizim qonaqpərvərlik qaydalarımıza görə musiqi də sifariş vermək olar. Biz muğam təmin edə, onun arzusunu yerinə yetirə bilərik. O özünün sevimli muğamına Qarabağda qulaq asa bilər”, – deyə Akopyan bildirib.
Akopyan həmçinin Mehriban Əliyevanın onun təklifini qəbul edəcəyi halda Bakını ziyarət etməyə hazır olacağını söyləyib.
Xüsusi olaraq vurğulayaq ki, əri Paşinyanın məntiqindən qətiyyən fərqlənməyən bu açıqlama ilə Akopyan Qarabağın Ermənistan tərəfindən işğal altında saxlanıldığını təsdiqləmiş olub. Çünki Ermənistan Baş nazirinin arvadı heç bir normal siyasi əxlaq və beynəlxalq hüquqla özünü “Dağlıq Qarabağ Respublikası” adlı qondarma qurumun “ev sahibəsi” kimi təqdim edə bilməzdi.
Əlbəttə, “Qarabağ Ermənistandır” deyən və işğalı təsdiqləməklə böyük bir siyasi təzyiq altına düşən, nəticədə Azərbaycan Prezidentinin beynəlxalq hüquqa əsaslanan sərt sözləri ilə qarşılaşan Paşinyanın arvadı elə bu məntiqdə də olmalı idi. Görünür, Ermənistan baş nazirinin ailəsində belə təzadlıq açıqlamaların səbəbi irsi çatışmazlıq sindiromudur.
Mehriban xanım Əliyeva, əlbəttə, Azərbaycan Ordusunun antiterror əməliyyatının ardınca Qarabağa gedəcək, orada muğam da dinləyəcək, Şuşa və Xankəndi iqamətgahlarında isə öz qonaqlarını qəbul edəcək.
İnanmırıq həmin mərasimlərdə Akopyan iştirak etmək istəsin…
