İrəvan Kremlə açıq demarş edir. Belə ki, Ermənistanda Rusiyanın “Birinci kanal”ının yayımı dayandırılıb. Reportyor.info xəbər verir ki, bu barədə Ermənistan Yüksək Texnologiyalar Nazirliyi məlumat yayıb. Bildirilib ki, ölkənin daxili siyasətinə hörmətsiz münasibət kanalların fəaliyyətinin dayandırılmasına səbəb olacaq.
Buna qədər isə Paşinyan MDB Hökumət Başçıları Şurasının iclasını boykot etməklə Moskvaya “əlcək atmışdı”. İndisə Birinci kanalın yayımı bloklanıb. Siyasi ekspert Fuad Əliyev hesab edir ki, Ermənistan hakimiyyəti Rusiya əleyhinə addımlarını sürətləndirir və getdikcə gərginliyi artırır.
Onun sözlərinə görə, Rusiya telekanallarında Paşinyan tənqid olunur, amma eyni yanaşma erməni Tv-lərində də var. Ekspertin fikrincə, sonuncu qərar münasibətləri daha da kəskinləşdirəcək: “Əvvəlcə Solovyovun efiri bloklandı, indisə dövlətin kanalına stop qoyuldu. Bu, Rusiyaya meydan oxumaqdır. Ola bilsin ki, müzakirələr nəticəsində məsələ həllini tapsın, amma belə gedişat Paşinyan üçün yaxşı gələcək vəd etmir. Onun Rusiya ilə düşmənçilik siyasəti hakimiyyətinin davamlı təzyiq altında qalmasına səbəb olur. Rusiya hələ ki dözümlü davranır, amma yekunu gözləyir”.
