Gözlənildiyi kimi, Ermənistanın baş naziri Nikol Paşinyan istefa verib. Bu barədə o, ölkənin İctimai Televiziyasında çıxışında bildirib.
Virtualaz.org Ermənistan KİV-lərinə istinadən xəbər verir ki, Paşinyanın bu addımı ölkə parlamentinin tezliklə buraxılması və növbədənkənar seçkilərin keçirilməsi məqsədini güdür. Baş nazirin sözlərinə görə, o vaxta kimi o, öz vəzifələrini icra edəcək.
“Həyəcanlı andır, çünki inqilab mərhələsinə son qoyur və yeni mərhələyə daxil oluruq. Beş aylıq işimə yekun vuuraraq hamıya sonsuz dəstəyə görə minnətdarlıq edirəm və kimi təəssüfləndirmişəmsə, üzr istəyirəm”, – Paşinyan deyib.
O, parlament seçkilərində bütün siyasi qüvvələrə uğur arzulayıb. Paşinyanın sözlərinə görə, hökumət seçkilərdə xalqın ifadə azadlığını təmin edəcək.
Bununla birlikdə, Paşinyan insanların etimadını və haqlı gözləntilərini doğrultmadığına görə üzrxahlıq edib.
Daha öncə baş nazir bildirmişdi ki, parlament seçkiləri dekabrın 10-da baş tutacaq.
Növbəti 15 gün ərzində hələlik fəaliyyətdə olan parlament iki dəfə baş naziri seçməməlidir. Hələlik Milli Yığıncaqda tımsil olunmuş heç bir siyasi qüvvə baş nazir postuna namizədini irəli sürəcəyi barədə bəyanat verməyib.
Parlament iki dəfə baş naziri seçə bilməzsə, buraxılır və yeni seçkilər təyin edilir. Konstitusiyaya görə, seçkilər parlamentin buraxılmasından sonra ən tezi 30 gün sonra, lakin 45 gündən gec olmayaraq keçirilməlidir.
