Ermənistan Silahlı Qüvvələrinin bölmələri yanvarın 11-i gecə saat 23:20-dən 12-si səhər saat 05:10-dək Basarkeçər rayonunun Yuxarı Şorca yaşayış məntəqəsində yerləşən mövqelərindən Kəlbəcər rayonunun Zəylik, Yellicə, eləcə də Şəmşəddin rayonunun Çinarlı, Muğancıq kəndləri istiqamətində yerləşən mövqelərindən Tovuz rayonunun Muncuqlu, Ağbulaq, Qoşa, Koxanəbi və Əsrik Cırdaxan yaşayış məntəqələri istiqamətində yerləşən Azərbaycan Ordusunun mövqelərini atıcı silahlar və iriçaplı pulemyotlardan fasilələrlə atəşə tutub.
Bu barədə Müdafiə Nazirliyi xəbər verir.
Ermənistanın xüsusi səbəb olmadan və müvafiq üçtərəfli bəyanatlarla üzərinə götürdüyü öhdəliklərini pozaraq iki dövlətin sərhədi boyunca vəziyyəti gərginləşdirməsi məqsədyönlü hərbi təxribat və hərbi avantüradır.
Bütün hallarda Azərbaycan Ordusunun bölmələri tərəfindən qarşı tərəfə adekvat və mütənasib cavab verilib. Azərbaycan Ordusunun sıralarında şəxsi heyət və hərbi texnika baxımdan itki olmayıb. Hazırda qeyd olunan istiqamətlərdə nisbi sakitlikdir. Əməliyyat şəraiti bölmələrimizin nəzarəti altındadır. Ermənistan tərəfindən iki ölkənin dövlət sərhədi boyunca qəsdən vəziyyətin yenidən gərginləşdirilməsi cəhdlərinin təkrarlana biləcəyini istisna etməyərək Azərbaycan Ordusunun bölmələri gücləndirilmiş rejimdə ölkəmizin suveren ərazilərini və sərhədlərinin təhlükəsizliyini qoruyur.
Oxu.az öz mənbələrinə istinadla Kəlbəcər istiqamətində Ermənistanın 8 əsgərinin məhv edildiyini, iki hərbi postunun isə darmadağın edildiyi haqda qeyri-rəsmi mənbələrdən əldə etdiyi məlumatı da paylaşmışdı.
11 yanvar saat 20:00 radələrində sərhəddə sabitlik yaransa da, Azərbaycan Müdafiə Nazirliyinin məlumatına görə, Ermənistan saat 23:20-dən bu gün səhər 05:10-a qədər qədər müxtəlif iriçaplı silahlardan Kəlbəcər və Qazax istiqamətində təxribatları davam etdirib.
Ordumuz bu təxribatları da cavabsız qoymayıb. Bu gün Ermənistan MN daha bir əsgərinin məhv edildiyini elan edib.
Erməni mediasının iddiasına görə, səhər saatlarında sərhəddə sabitlik yalnız rus sülhməramlılarının müraciətindən sonra mümkün olub.
