Azərbaycanda koronavirusa yoluxanların arasında qadınlar çoxdur.
Bu haqda Nazirlər Kabineti yanında Operativ Qərargahın mətbuat konfransında TƏBİB-in İdarə Heyətinin sədri Ramin Bayramlı deyib. Onun sözlərinə görə, Azərbaycanda koronavirusa yoluxanlar arasında qadınlar üstünlük təşkil edir. Koronavirusa yoluxanların 54 faizi qadındır.
Maraqlıdır, niyə qadınlar virusa daha çox yoluxur?
Reportyor.info xəbər verir ki, Respublikanın baş infeksionisti Cəlal İsayevin sözlərinə görə, bu faiz o qədər də böyük fərq deyil:
“Əvvəlcə, qeyd edim ki, burada immun sistemi o qədər də vacib rol oynamayıb. Qadınlarda immun sistemi bəlkə də, kişilərdən daha güclü və dayanıqlıdır. Əsas məsələ budur ki, ictimai həyatda qadınlar daha fəaldır, buna görə də onların yoluxma riski daha yüksəkdir. Həmçinin qadınlar daha çox təmasda olurlar. Digər tərəfdən, bu rəqəmlə deyə bilmərik ki, fərq çox böyükdür. Əgər 10-20 faiz artıq yoluxma olsaydı, o zaman böyük fərq olduğunu deyə bilərdik”.
Xatırladaq ki, Çin Xəstəliklərə Nəzarət və Profilaktika Mərkəzi ölüm hallarının kişilər arasında daha çox olduğu haqqında məlumat yayıb. Bu say kişilərdə 2,8 faiz, qadınlarda isə 1,7 faiz təşkil edib. Buna səbəb kimi kişilərin daha çox siqaret çəkməsi, daha ağır işlərdə çalışması, həkimə getmək istəksizliyi və qadınlara nisbətən pəhriz seçimlərinə daha az əhəmiyyət vermələri göstərilib.
Məlumat üçün bildirək ki, hazırkı dövrədək ölkəmizdə 1617 nəfərin koronavirus infeksiyasına yoluxması faktı müəyyən edilib, onlardan 1080 nəfər müalicə olunaraq sağalıb. 21 nəfər vəfat edib, 516 nəfərin xüsusi rejimli xəstəxanalarda müalicəsi davam etdirilir.
Həmin şəxslərdən 15 nəfərin vəziyyəti ağır, 21 nəfərin vəziyyəti orta ağır qiymətləndirilir, digərlərinin səhhəti stabildir.
Qeyd edək ki, koronavirus dünyanın 210 ölkəsinə yayılıb. 2,8 milyon insanın yoluxduğu virus 198 min insanın hyatına son qoyub. (Cəbhə.info)
