Son vaxtlar bəzi məmurların ev dustaqlığına buraxılması ilə bağlı qərarlar verilir. Bir neçə gün öncə rüşvətə görə saxlanılan Göyçay Rayon İcra Hakimiyyəti başçısının köməkçisi Vahid İsayev və Göyçayın icra nümayəndəsi Rəşad Şükürov, sabiq əmək və əhalinin sosial müdafiəsi naziri Səlim Müslümov ev dustaqlığına buraxılıb.
Bunlar cəmiyyətdə birmənalı qarşılanmayıb və sual yaradıb: bəzi məmurların ev dustaqlığına buraxılmasının səbəbi nədir? Niyə cinayəti sabit qaldığı halda adi vətəndaş yox, məhz məmurlar ev dustaqlığına buraxılır?
Məsələ ilə bağlı hərbi ekspert Üzeyir Cəfərov Bakupost.az -a açıqlama verib.
Ekspert bu məsələdə ayrı-seçkiliklə bağlı narazılığını ifadə edib:
“Səlim Müslümovun guya xəstələnib ev dustaqlığına buraxılmasına etiraz edənlərdən biri də mən idim. Onun heç bir ciddi xəstəliyi olmadığını hesab edirəm. Onun azadlığa buraxılması tamaşa idi. Səlim Müslümov Gömrük Komitəsinin sədr müavini, Vergilər Nazirliyində işləyəndə, Əmək və Əhalinin Sosial Müdafiəsi Nazirliyində olanda onun sağlamlığı ilə bağlı heç bir problemi olmayıb. Nə oldu ki, Kürdəxanı həbsxanasına düşəndən sonra onda ciddi problem yarandı?
Prezident yanında Əfv Komissiyasının üzvlərinin də bəzi hərəkətlərini başa düşmədim. 2020-ci ildə Ağır Cinayətlər Məhkəməsinin hökmü ilə həbs olunmuş adam cəzasının müəyyən hissəsini də çəkməmiş azadlığa buraxılır. Şəmsi Şəmsizadəni şəxsən tanımasam da, o, keçmiş baş prokuror Zakir Qaralova görə 22 il həbsxanada qaldı. O, uzun müddət cəza çəkir, əfvə düşmür, amma dünən həyat yoldaşını öldürən, əvvəl Bakı İnzibati Məhkəməsi, sonra isə Sabunçu rayon Məhkəməsinin hakimi olan Fəqan Əhmədovun cəzası azaldılır. Bu adam cəzaçəkmə müəssisəsində lazımi müddətə qalmadı ki, onun davranışları çıxandan sonra cinayət törətməyəcəyinə əsas versin.
Kiminsə həbsdə qalmasının tərəfdarı deyiləm, sadəcə ayrı-seçkilik cəmiyyətdə çox böyük narazılıq yaradır.
Hesab edirəm ki, Ramiz Rzayev çoxdan istirahətə göndərilməli idi. Ali Məhkəmənin sədri olsa da, həm yaşına görə, həm Avropa Məhkəməsində qəbul olunmuş qərarlara görə Azərbaycan dövləti cərimə ödəməli olur, ölkənin imicinə ziyan vurulur. Bu adam hələ də Ali Məhkəmənin sədridir. Azərbaycanda cavan kadrlar yoxdur?
Məhkəmə Hüquq Şurası iclas keçirir, hakimləri cəzalandırır. Bu yaxşı haldır. Amma adları açıqlanmır. Bunu başa düşmürəm. Hüquqi dövlətin adına belə şeylər yaraşmır. Bəzi məmurlar icra başçısı olanda göylə gedirlər, cəzaçəkmə müəssisəsinə düşdükdə isə olmayan xəstəlikləri peyda olur.
Cəzaçəkmə müəssisələri ilə bağlı çox ciddi araşdırma və nəzarətə ehtiyac yaranıb. Əvvəllər hüquq müdafiəçiləri gedib baxırdılar, amma onlar artıq bəzi problemləri görməzlikdən gəlirlər”.
