Nazimi şikəst edən “Elmed”də xəstə öldü – Növbəti cinayət işi

Bakıda klinikada ölüm hadisəsi baş verib.

Reportyor.info Trend-ə istinadən xəbər verir ki, hadisə “Elmed” Klinikasında baş verib.

1963-cü il təvəllüdlü Əliyev Himayil Əli oğlu oktyabrın 4-də səhər saat 11 radələrində “öd daşı və kəskin kalkulyoz” diaqnozu ilə “Elmed” Klinikasına daxil olub və əməliyyata götürülüb.

H.Əliyev əməliyyatdan sonra həmin gün axşam saat 21 radələrində dünyasını dəyişib.

Ölümün səbəblərini müəyyənləşdirmək üçün meyit Səhiyyə Nazirliyinin Məhkəmə Tibb Ekspertizasına təqdim edilib.

Faktla bağlı Binəqədi rayon Prokurorluğunda Cinayət Məcəlləsinin 314.2-ci maddəsilə cinayət işi başlanıb.

Xatırladaq ki, bir müddət öncə tanınmış müğənni Nazim Pişyarinin (Faytonçu Nazim) səhhətində bu klinikada üzləşdiyi həkim səhlənkarlığı ucbatından ciddi problemlər yaranmışdı və rezonans doğuran məhkəmə çəkişmələrinə səbəb olmuşdu.

***

“Elmed” klinikasının mətbuat xidmətinin rəhbəri Yusif Osmanlı Axar.az-a açıqlamasında bildirib ki, xəstənin ölümünə səbəb başqa xəstəlik ola bilər:

“Əliyev Himayil Əli oğlu təxminən saat 13:30 radələrində “Elmed” Tibb Mərkəzində öd kisəsindən əməliyyat olunub. Əməliyyat ümumilikdə 30-35 dəqiqə çəkib. H.Əliyev saat 14 radələrində əməliyyatdan çıxarılaraq palataya yerləşdirilib. Onun səhhəti qaydasında olub, hətta yaxınları ilə də görüşüb.

Saat 20-21 radələrində halı qəfildən pisləşib və dünyasını dəyişib. Əməliyyatla ölüm arasında 6-7 saata qədər vaxt keçib.

Səhiyyə Nazirliyinin Məhkəmə Tibbi Ekspertizası ölüm səbəbini müəyyənləşdirmədiyi üçün hadisə ilə bağlı konkret fikir bildirə bilmərik.

Həkimlərimiz ehtimal edir ki, xəstənin halının qəfil pisləşməsinin səbəbi ya infarkt, ya da damarların tutulması ilə əlaqəli ola bilər”.