Tovuz rayonunun Dondar Quşçu kənd sakini 10 yaşlı Nərmin Quliyevanın qətli ilə bağlı müəmma davam edir. Reportyor.info xatırladır ki, ölkəni silkələyən bu cinayətə görə Nərmin Quliyevanın həmkəndlisi 48 yaşlı İlkin Süleymanov təqsirləndirilir.
21 noyabr 2019-cu il tarixdə Nərmin Quliyevanın itkin düşməsi barədə məlumat yayılıb. 45 gün sonra, 6 yanvar 2020-ci ildə onun meyiti Dondar Quşçu kənd ərazisindəki boş sahədə yandırılmış halda aşkarlanıb. İki gün sonra isə İlkin Süleymanov saxlanılıb. Ona Cinayət Məcəlləsinin 120.2.4 (xüsusi amansızlıqla qəsdən adam öldürmə), 120.2.9 (təqsirkar şəxs üçün aşkar surətdə köməksiz vəziyyətdə olan adamı qəsdən öldürmə), 144.3 (adam oğurluğu) və başqa maddələri ilə ittiham irəli sürülüb. Ardınca İlkin Süleymanovun ibtidai istintaq zamanı cinayəti etiraf etdiyi barədə məlumat yayılıb.
Məhkəmə istintaqı zamanı isə İlkin Süleymanov ilk iclasdaca günahsız olduğunu, ibtidai istintaq zamanı işgənclərə məruz qaldığını və cinayəti öz üzərinə götürməyə məcbur edildiyini bildirib.
Sonrakı iclaslarda da İlkin Süleymanovun bu hadisədə günahsız olduğu, onun sadəcə qurban seçildiyinə şübhələr artıb. Hazırda iş o yerdədir ki, ictimai rəydə İlkin Süleymanovun günahsız olduğı fikri dominantlıq təşkil edir.
Bu da səbəbsiz deyil. Məhkəmə istintaqı zamanı ortaya bir sıra ziddiyyətli məqamlar çıxıb. Xüsusilə, Nərmin Quliyevanın geyimi ilə bağlı ziddiyyətlər istintaqın ədalətli aparıldığını şübhə altına qoyur.
Həmin vaxt Tovuz Rayon Polis Şöbəsinin rəisi olmuş Şirzad Əsgərovun Gəncə Şəhər Baş Polis İdarəsinə, Gədəbəy, Şəmkir, Ağstafa, Samux, Göygöl və Qazax rayon polis şöbələrinə ünvanladığı məktubda Nərmin Quliyevanın əynində cins şalvarın olduğu qeyd edilir.
Amma Nərmin Quliyevanın meyitinə baxış keçirilməsi haqqında prtokolda hər hansı şalvardan söhbət getmir. Protokolda Nərminin geyimi barədə bütün detallar qeyd edilib. Lakin onun əynində cins şalvarın olması, yaxud buna dəlalət edən hər hansı detal aşkarlanmayıb.
Hər iki sənədin surəti əlimizdədir və onların fotolarını oxucuların diqqətinə çatdırırıq.
İlkin Süleymanovun yaxınları deyir ki, Nərmin Quliyevanın əynində cins şalvar olduğunu atası Şərif Quliyev birbaşa Şirzad Əsgərova verdiyi izahatda bildirib. Sonradan məhz həmin “şalvarın” üzərində İlkinə məxsus gödəskçənin lifli “tapılıb”.
Bu fakt “cins şalvar”ın cinayəti İlkinin ayağına yazmaq üçün sonradan düşünüldüyünü söyləməyə əsas verir.
Bu işdə maraqlı faktlardan biri də ekspertiza ilə bağlıdır.
İlkin Süleymanovun yaxınları bildirir ki, onun barəsində həbs qətimkan tədbirinin dəyişdirilməsi barədə apellyasiya şikayətinə baxılan zaman Gəncə Apellyasiya Məhkəməsinin hakimi şəxsi mülahizələrinə əsasən şikayəti təmin etməyib.
Hakim İlkin Süleymanovun yaşadığı evin həyətində tapılan və üzərində qan olan daşa istinad edib. Həmin qanın 2-ci qrup olduğu və Nərmin Quliyevanın qan qrupu ilə üst-üstə düşdüyünü iddia edərək İlkini həbsdə saxlayıb.
Təsəvvür edin, İlkinin apellyasiya şikayətinə 23 yanvar 2020-ci il tarixdə baxılıb. Daşın üzərindəki qanın ekspertiza rəyi yanvarın 27-də verilib. Yəni,məhkəmə gedərkən hələ daşın üzərindəki qanla bağlı ortada hər hansı rəy olmayıb. Digər tərəfdən, yanvarın 27-də verilən rəydə isə qan qrupu barəsində heç bir qeyd yoxdur.
Daha dəhşətli fakt isə Nərmin Quliyevanın qanı ilə bağlı ekspertiza rəyi barədədir. Bu rəy yanvarın 24-də, İlkin Süleymanovun apellyasiya məhkəməsindən bir gün sonra məlum olub. İndi ortaya sual çıxır: Hakim həm daşın üzərindəki, həm də Nərmin Quliyevanın qanı ilə bağlı ekspertiza rəylərinin hazır olmadığı halda hansı əsasla qərar verib? Bu sualın cavabı açıq qalır.
İlkin Süleymanovun yaxınları bu faktla bağlı Məhkəmə Hüquq Şurasına müraciət etməyə hazırlaşırlar.Bu müraciətin müsbət nəticə verib-verməyəcəyini deyə bilməyərik. Bəlli olan odur ki, hər məhkəmə iclasında, həmçinin müstəqil jurnalistlərinin bu işlə bağlı araşdırmalarda İlkin Süleymanovun günahsızlığını üzə çıxardan yeni faktların şahidi oluruq.
