Gəncə Ağır Cinayətlər Məhkəməsində Tovuz rayonunda 10 yaşlı Nərmin Quliyevanı qətlə yetirməkdə təqsirləndirilən İlkin Süleymanovun cinayət işi üzrə məhkəmə prosesi davam etdirlir.
Reportyor.info xəbər verir ki, növbəti proses dünən baş tutub.
Gəncə Ağır Cinayətlər Məhkəməsində hakim Dadaş İmanovun sədliyi ilə keçirilən prosesdə vəkillər çıxış edib. Bundan sonra proses təxir salınıb.
Məhkəmə prosesindən sonra tərəflər arasında mübahisə yaranıb. İlkin Süleymanovun yaxınları onun təqsirsiz olduğunu bildirib. Nərmin Quliyevanın valideynləri isə Nərmin Quliyevanı məhz İlkin Süleymanovun qətlə yetirdiyini iddia edib. Onlar müttəhimin ömürlük azadlıqdan məhrum edilməsini istəyir. Tərəflər bir-birinin ünvanına müxtəlif ittihamlar səsləndirib.
Tovuz rayonunun Dondar Quşçu kənd sakini 10 yaşlı Nərmin Quliyeva 2019-cu il noyabrın 21-də itkin düşüb, onun meyiti 2020-ci il yanvarın 6-da yandırılmış halda tapılıb.
Həmin ilin yanvarın 10-da isə hadisəni törətməkdə şübhəli bilinən Dondar Quşçu kənd sakini, 1973-cü il təvəllüdlü İlkin Süleymanov saxlanılaraq istintaqa cəlb edilib. Ona Cinayət Məcəlləsinin xüsusi amansızlıqla qəsdən adam öldürmə, təqsirkar şəxs üçün aşkar surətdə köməksiz vəziyyətdə olan adamı qəsdən öldürmə, adam oğurluğu və başqa maddələrlə nəzərdə tutulan ittiham elan olunub.
Gülay
