Bəxtiyar Sadıqov: “Seçkidə iştirak etmirsinizsə, gedin, yerinizdə oturun”

Ölkənin aparıcı müxalif qurumlarından sayılan Müsavat, Milli Şura və REAL hərəkatı martın ortalarından etibarən birgə mitinqlər keçirə bilərlər. Bununla bağlı Milli Şura hər iki siyasi quruma müraciət ünvanlayıb. Artıq bu müraciətə Müsavat başqanı Arif Hacılı tərəfindən müsbət reaksiya verilib. REAL-ın isə qərarı həftəsonu məlum olacaq.

Bu barədə “Report”a açıqlama verən REAL-ın icraçı katibi Natiq Cəfərli bildirib ki, prezident seçkiləri öncəsi mitinqlərin keçirilməsi hökumətə arqument verəcək: “Bu mitinqlər sərbəst toplaşmaq hüququnun tam təmin olunduğu görüntüsünü yaradacaq. Yəni bunun bir çox mənfi cəhətləri var. Bu mənim şəxsi fikrimdir. REAL hərəkatında qərarlar kollektiv şəkildə verilir. Milli Şuranın birgə mitinqlərin keçirilməsi ilə bağlı təklifini müzakirə edəcəyik. Müzakirələr zamanı məsələnin mənfi və ya müsbət tərəfləri, mövcud təhlükələr müzakirə olunacaq. İdarə Heyətinin qərarı İlqar Məmmədova da göndərilməlidir. O, həbsdə olduğu üçün operativ qərar qəbul edə bilmirik. Mitinqlə bağlı qərar bu həftənin sonuna qədər açıqlanacaq”.

Mitinqlər məsələsi gündəmə çıxan kimi müxalif düşərgə daxilində sosial şəbəkələrdə bir sıra müzakirələr gedir. Yaranacaq birliyin əvvəlkilər kimi uzunömürlü olmayacağı, ən gec halda 11 apreldəki növbədənkənar prezident seçkilərindən sonra dağılacağı bildirilir. Milli Şuranın yalnız iki siyasi quruma müraciət ünvanlaması ətrafında gedən müzakirələrdə qurum sərt şəkildə qınanır. Bununla Milli Şuranın müxalifət daxilində növbəti narazılığın əsasını qoyduğu, bir növ düşərgəni parçaladığı vurğulanır. Bundan əlavə, vaxtilə Milli Şuranı tərk edən Müsavata müraciətin göndərilməsi heç də birmənalı qarşılanmayıb. Seçkilər öncəsi aksiyaların təşkil olunmasına qarşı çıxanlar da kifayət qədər çoxdur. Onlar hesab edirlər ki, hazırda belə mitinqlər daha çox hakimiyyət üçün sərfəlidir.

Son bir ildə Milli Şura və Müsavat arasında birliyin yaranmasında maraqlı olan və bunun üçün danışıqlar aparan Müsavat Divanının üzvü Tofiq Yaqublu mitinqlərin baş tutacağını düşünür: “Artıq ilkin razılaşma var, əlbəttə, mitinqlər olacaq. Hakimiyyət tərəfindən hər hansı bir maneələr yaradılmasa, mitinq elan olunacaq və keçiriləcək. Birgə mitinqi hər iki tərəf müsbət qarşılayır. Xoş iradə, niyyət ortadadır. Məsələnin texniki tərəfləri qalır. Geridə qalan hakimiyyətin işidir. Müxalifət sarıdan heç bir problem olası deyil. Konkret nə vaxt mitinqlərin keçiriləcəyini deyə bilmərəm. Hər şey nəzərə alınmalı, hesablanmalıdır. Həftənin hansı günü mitinqlər olsun, hava şəraiti, bayram günləri və digər bu kimi məsələlər razılaşdırılmalıdır. Bunlar da prinsipal, elə də ciddi mahiyyət daşımayan texniki məsələlərdir”.

REAL-ın İdarə Heyətinin üzvü Azər Qasımlı birgə mitinqlə bağlı hərəkatın daxilində çoxdan müzakirələrin getdiyini söylədi: “Seçkilərdə nə edəcəyik, yaxud etməyəcəyik kimi müzakirələr aparmışıq. Birgə mitinq üçün rəsmi müraciəti təbii ki, dəyərləndirəcəyik. Yaxın bir neçə gün ərzində bu məsələ ilə bağlı qərarımız olacaq. Hər üç qurumun təmsilçiləri arasında görüşlər olmayıb. Hər halda, bizim iştirak etmədiyimiz dəqiqdir”.

Hakimiyyət müxalifətin keçirəcəyi mitinqlərdən narahat deyil.  “Azərbaycan” qəzetinin baş redaktoru, YAP-çı deputat  Bəxtiyar Sadıqov “Yeni Müsavat”a bunları dedi: “O adam mitinq keçirmək, boykot fikrinə düşər ki, onun sosial bazası olsun. Bu gün Milli Şura, Müsavat və digər mitinq eşqinə düşən qurumların sosial bazaları yoxdur. Üzvləri onlardan üz döndəriblər. Siyasi qurumlar kimi nəinki xalq arasında, hətta  öz üzvlərinin gözündən düşüblər. Yaxşı bilirlər ki, seçkilərə getsələr cüzi səs faizi ilə biabır olacaqlar. Qorxularından seçkilərdə iştirak etmirlər, bunun da adını boykot qoyurlar. Siz boykot etmirsiniz, öz biabırçılğınızın qarşısını almaq üçün seçkilərə getmirsiniz. Bunların durub seçkiqabağı mitinq edəcəklərini demələri, sadəcə, gülüncdür. Sən nə deyirsən, nə istəyirsən? Onların mitinq keçirmək istəkləri cığallıqdan başqa bir şey deyil. Olmayan varlıqlarını biabırçı mitinqlərlə ”sübut etməyə” çalışırlar. Əslində onlar heç nəyi onsuz da sübut edə bilmirlər. Çünki gücü olan partiya seçkilərə gedər.

Siyasi partiyanı ona görə yaradırsan ki, hakimiyyətə iddialısan. Bunun üçün də nüfuzun, xalqı özünə cəlb etmək üçün ideyaların olmalıdır. Sizlərin isə heç nəyi yoxdur. Ona görə heç kim onlara inanmır. Onlar xaricdən gələn sifarişləri bu seçkilər öncəsi icra etməyə çalışırlar. Düşünürlər ki, indi sabitliyə bu yollarla xələl gətirə bilərlər. Yaxşı olar ki, bunlar atalar, sözündə deyildiyi kimi, “ayıblarına kor olsunlar”. Seçkidə iştirak etmirsinizsə, gedin,  yerinizdə oturun. Xalq əgər səni tanımırsa, nüfuzun yoxdursa, siyasət meydanından get. İndiyə qədər bu qurumların yaratdıqları hansı birliyin ömrü uzun olub ki, bunun da ömrü uzun olsun. Adətən bunlar bir-birini istəməkdən, fəaliyyətlərini uyğunlaşdırmaqdan deyil, bir dərddə olduqlarına görə birləşirlər. Birləşməklə azlıqlarını ört-basdır etmək istəyirlər ki, meydana çıxanda bir az çox görünsünlər. Amma bununla belə ortalığa çıxanda “Məhsul” stadionunun heç onda birini belə doldura bilmirlər. İndi bu üç qurum birgə mitinq keçirmək istəyirlər ki, bəlkə qaraltılarını göstərə bilərlər. Bunlar səmimi əməkdaşlıq etmirlər. Onlar haqqında daim deyirlər ki, bunlar mehriban düşmənlərdir. Müəyyən qısa bir zamanı birlikdə gedib, sonra yenə bir-birinin arxasınca danışmağa, bir-birilərinin kölgələrini qılınclamağa başlayacaqlar. İndiyə qədər belə olub, bu dəfə də belə olacaq”.

Milli Şuranın yalnız iki partiyaya müraciət etməsi ilə bağlı Gələcək Azərbaycan Partiyasının sədri Ağasif Şakiroğlu Cəmil Həsənliyə müraciət edərək, ona sərt suallar ünvanlayıb: “Əslində ilk baxışdan müxalifətin birliyinə hesablanmış kimi normal görünən bu çağırışın mahiyyəti bizləri və şəxsən məni üzdü və bir qədər də təəccübləndirdi . Bu səbəbdən də üzümü hörmətli Cəmil Həsənliyə tutub səslənirəm: “Siz müxalifəti birliyə çağıran məlum müraciətinizi edən zaman konkret olaraq iki quruma səsləndikdə həqiqətənmi düşünməmisiniz ki, seçkidə iştirak etməyən, bir sıra partiyaları, siyasi hərəkatları qıraqda saxlamaq cəhdinizlə elə müxalifəti parçalamış oldunuz?!

Siz həqiqətənmi düşünmədən bu müraciəti etmisiniz?! Düşünmürsünüz ki, digər müxalif qurumları qıraqda saxlamaq cəhdiniz yalnız və yalnız iqtidarın işinə yaramış olacaq?! Siz müxalifəti birləşdirmək əvəzinə, məlum müraciətinizlə, əksinə, müxalifəti qütblərə böldüyünüzün fərqindəsinizmi?!

Sizlər daha möhtəşəm aksiyaların hamılıqla, bütün siyasi qüvvələrin bərabər qaydada iştirakı ilə keçirilməsinə nə səbəbdən qarşı çıxırsınız?”

Cavanşir ABBASLI,