2018-ci il may ayının 28-də müsəlman Şərqində ilk parlamentli respublikanın-Azərbaycan Xalq Cümhuriyyətinin yaranmasının 100 illiyi tamam olacaq. 2017-ci il mayın 16-da Azərbaycan prezidenti İlham Əliyev Azərbaycan Xalq Cümhuriyyətinin 100 illik yubileyi haqqında sərəncam imzalayıb.
Bu tarixi hadisənin həm də Azərbaycan Xalq Cümhuriyyətinin banisi Məhəmməd Əmin Rəsulzadənin Türkiyənin paytaxtı Ankara şəhərindəki Əsri qəbiristanlığındakı məzarı önündə də dövlət səviyyəsində qeyd edilməsi, oraya yüksək dövlət rəsmilərinin də iştirakı ilə nümayəndə heyətinin getməsinə ehtiyac olduğu təklifləri irəli sürülməkdədir.
Bütöv Azərbaycan Xalq Cəbhəsinin sədr müavini, politoloq Elçin Mirzəbəyli “Yeni Müsavat”a bu barədə açıqlamasında bildirdi ki, Azərbaycan Xalq Cümhuriyyətinin 100 illiyi dünyada yaşayan bütün azərbaycanlılar, bütövlükdə türk dünyası üçün böyük tarixi hadisədir, bayramdır. Cümhuriyyətimizin 100 illiyi siyasi hakimiyyətlərin, partiyaların bayramı deyil, Azərbaycan dövlətinin bayramıdır.
Bu baxımdan Məhəmməd Əmin Rəsulzadənin, Əlimərdan bəy Topçubaşovun, Nəsib bəy Yusifbəylinin və bütün cümhuriyyət qurucularımızın məzarları önündə tədbirlər keçirilməli, onların Azərbaycan xalqı qarşısındakı müstəsna tarixi xidmətləri xatırlanmalıdır: “Azərbaycan Xalq Cümhuriyyəti Azərbaycan Respublikasının sələfidir. Bir oğul ata-babasının mirasına, ənənəsinə, xatirəsinə necə sahib çıxırsa, biz də Cümhuriyyətimizə eləcə sahib çıxmalıyıq”.
Yeni AXCP-nin sədri Razi Nurullayev isə bildirdi ki, Azərbaycan Xalq Cümhuriyyəti böyük öndər Məhəmməd Əmin Rəsulzadənin adı ilə xarakterizə olunur. Bunun üçün də Rəsulzadə şəxsiyyətinə tam önəm vermədən, onun adını bir neçə yerdə əbədiləşdirmədən, Bakının görkəmli yerlərinin birində abidə qoymadan, dövlət səviyyəsində onun məzarını Ankarada ziyarət etmədən bayram tədbirləri çılpaq görünər: “Biz Məhəmməd Əmin Rəsulzadə və digər qurucu atalara layiqli və xalqın da razı qalacağı önəmin verilməsini istəyirik. Daha iki vacib məsələni də qeyd etmək istəyirəm. Birincisi, Cümhuriyyətimizin 100 illiyinin qeyd olunması, planlaşdırılması və iştirakı məsələlərində normal və sağlam müxalifətin olması çox vacibdir, həm də zərurətdir. İkincisi, bu il həm də Azərbaycanın azadlıq simvolu olan Əbülfəz Elçibəyin 80 illik yubileyidir. Bu tarixi hadisənin də bu il paralel olaraq dövlət səviyyəsində keçirilməsinin tərəfdarıyıq. Biz əlimizdən gələni edəcəyik, amma əlimizdən çox şeyin gəlmədiyi də aşkardır. Müxalifət təşkilatları da Rəsulzadənin məzarını ziyarət etməklə Cümhuriyyətin 100 iliyini onun məzarının önündə qeyd etsə daha yaxşı olar”.
Etibar SEYİDAĞA,
“Yeni Müsavat”
Discussion about this post