REAL Partiyasının sədri İlqar Məmmədov deyib ki, YAP daha səmərəli partiya idarəçiliyini REAL-dan öyrənir. Reportyor.info xəbər verir ki, ötən il apardıqları struktur dəyişikliyini bu gün YAP təkrarlayıb:
“Özünün ali seçkili orqanını buraxdı və bizim idarəetmə modelinə keçdi. Əsas fərq odur ki, partiya sədrini onlarda Qurultay seçir, bizdə isə Qurultayın seçdiyi ali orqan. Bu, sədr funksiyasını bizdə daha kollegial, daha demokratik edir. Sovetin partiya modellərindən tədricən bütün partiyalar uzaqlaşacaq. REAL bu dəyişikliyin də önündə gedir”.
Onun bu fikirlərinə Müsavat Partiyasından cavab gəlib. Partiya başqanının müavini Səxavət Soltanlı qeyd edib ki, İlqar Məmmədov YAP-ın onlardan idarəçilik öyrəndiyini deməsi ilə yanaşı başqa partiyalara da idarəçiliyi onlardan öyrənməklə bağlı çağırış etməsi lap ağ oldu.
“Ölkədə daxili demokratiyasi, demokratik seçki ənənəsi, kollegial idarəçilik qabiliyyəti olan partiyanın üzvü olaraq “ağ eləməyin” demək haqqımızdan istifadə edirəm. Müsavat partiyalara daxili seçkilərini gizli, demokratik, şəffaf keçirməklə bağlı çağırışlar etdi, YAP səhv başa düşüb bütün qurultayı gizli keçirdi, mətbuatsız, üzvlərsiz.
Öz üzvlərinə qurultayla bağlı adi məlumat verməyən, üzvlərindən belə xəbərsiz, gizli qurultay keçirən, bununla kifayətlənməyib qurultayın yekunları ilə bağlı üzvlərinə, xalqa məlumat verməyə ehtiyac belə hiss etməyən partiya haqqında “idarəçiliyi bizdən öyrənirlər” demək ciddi əks-təbliğatdır.
5-6 nəfərlə alternativsiz seçkidə, açıq səsvermə ilə, debatsız, müzakirələrsiz, təbliğatsız özünə lider, rəhbər seçən partiyanın rəhbərinin başqa partiyalar haqda söz deməyə nə mənəvi, nə də siyasi haqqı yoxdur. İstisnasız, bütün partiyalar daxili demokratiyanı da, kolegial idarəçiliyi də, gizli səsverməni də Müsavat Partiyasından öyrənməlidir”.
