Martın 12-də Mingəçevir şəhərində yerləşən 11 nömrəli körpələr evi-uşaq bağçasından evə gələn uşaqlarda (10 nəfərə yaxın) qida zəhərlənməsi baş verib. Reportyor.info yazır ki, bu haqda sosial şəbəkədə məlumat yayılıb. Faktı sosial media hesabında paylaşan İxtiyar Həsənli sual edir ki, niyə uşaq bağçalarının yeməyi bir mərkəzdə bişirilir və oradan paylanılır:
“Axı elə uşaq bağçaları var şəhər mərkəzindən 7-8 km məsafədə yerləşir. Bəs isti yeməklər oraya gedənə qədər buza dönmürmü? Bu oyunbazlığın başında kimlər dayanır? Guya qida təminatında şəffaflıq yaradırsınız? Sizə kim səlahiyyət verib ki, uşaqların taleyi ilə oyun oynayasınız? Ay qida zəncirinin pozulmasına nəzarət edən Qida Təhlükəsizlik Agentliyi və onun “baytar” həkimləri, hara baxırsınız? Mingəçevir Təhsil sektoru və digər müvafiq qurumlar,niyə baş vermiş hadisəni gizlədirsiniz?
DİN-in Mətbuat Xidmətinin Şəki regional qrupundan “reportyor.info” -ya bildirilib ki, Mingəçevir şəhərində yerləşən körpələr evində uşaqların zəhərlənməsi ilə bağlı polis şöbəsinə, eləcə də xəstəxanaya məlumat daxil olmayıb. Ancaq sosial şəbəkələrdə yayılan həmin iddialarla bağlı təhqiqat araşdırmaları aparılır.
