Son illərdə türkiyəlilərin Londona olan marağı olduqca artıb. “Allytta” əmlak şirkətinin baş meneceri Neşe Cenkins çoxlu sayda türk iş adamının qiymətlərin müvəqqəti azalmasından istifadə edərək əmlak sahəsinə sərmayə qoyduğunu və ümumilikdə, son 2 ildə türk sərmayədarların sayının 297% yüksəldiyini bildirib.
Cenkins “Son 5 ildə 85 mindən artıq Türkiyə vətəndaşının Londonda ev aldığını təxmin edirik. Bundan əlavə, rəsmi statistikaya əsasən, bu müddət ərzində 17 min türkiyəli İngiltərəyə köçüb” deyib.
Çelsi sevgisi
Virtualaz.org Türkiyə mətbuatına istinadən xəbər verir ki, Londonda daşınmaz əmlakın 375-400 min funt sterlinqdən başladığını, amma bu qiymətə sadəcə 1+1 tipli mənzilin alına bilindiyini qeyd edən Cenkins türklərin, əsasən, Londona gedib-gələndə qalmaq üçün 2+1 otaqlı mənzillər aldığını və bəzilərinin də övladlarının təhsili üçün buradan əmlak əldə etdiklərini söyləyib. O bildirib ki, türklər Londonda evlərə orta statistik göstərici üzrə 1 milyon funt sterlinq pul ayırırlar.
“Bundan aşağısını da görmüşük, yüksəyini də, amma orta statistik qiymət 1 milyon funt sterlinqdir” deyə Cenkins bildirib. Və əlavə edib ki, türkiyəlilər Londonda ən çox Çelsi bölgəsindən əmlak almağa üstünlük verirlər.
140 milyon funt sterlinqə ev alan azərbaycanlı
Londonda yeni binaların asanlıqla tikilə bilmədiyini deyən Cenkins sərfəli qiymətə ev almağın çox çətinləşdiyini, hətta ingilislərin belə Londondan ev ala bilmədiyini, əsasən, qlobal burjuaziyanın buranı seçdiyini bildirib.
O deyib ki, bu günə qədər türklər arasında ən yüksək qiymətə əmlak alan şəxs 140 milyon funt sterlinq ödəyən bir Azərbaycan vətəndaşı olub. Bir müddət əvvəl isə Türkiyə vətəndaşı olan bir şəxs Londondakı “The Knightsbridge Aparments”də 90 milyon funt sterlinq dəyərində ev alıb.
Londondan ev almaq vaxtı
Londondakı əmlak bazarının son 20 ildə çox sürətli şəkildə böyüdüyünü, 1998-ci ildə 98 min funt-sterlinq olan orta statistik qiymətlərin bu gün təxminən 485 min funt sterlinqə yüksəldiyini bildirən Cenkins Birləşmiş Krallıq ərazisində həmin göstəricinin 227 min funt sterlinq olduğunu söyləyib.
“Brexit”dən sonra isə qiymətlər nisbətən azalıb. Rəsmi göstəriciyə əsasən, Londonda əmlak qiymətləri son 1 ildə 0,7% düşüb. Cenkinsin sözlərinə görə, bu qiymət dəyişikliyi 2009-cu ildəki iqtisadi böhrandan sonrakı ən böyük azalmadır.
Lakin Cenkins onu da bildirib ki, “Brexit”dən sonra, yəni 2019-2020-ci illərdə bu vəziyyət əksi ilə əvəz olunacaq və qiymətlər yenidən yüksəlməyə başlayacaq. O deyib ki, bu ehtimalı nəzərə alanda hazırkı dövr Londondan ev almaq üçün ən əlverişli vaxtdır.
Neşe Cenkins son olaraq məlumat verib ki, Londona ən böyük maraq Sinqapur, Rusiya və İran körfəzi ölkələrindəndir.
