Son illərdə durğunluq dövrünü yaşayan, əsaslı inkişafı getməyən bölgələrimiz olub.
Regionların sosial-iqtisadi proqramı çərçivəsində həyata keçirilən layihələr də rayonların yox, rəhbərlərinin şəraitini yaxşılaşdırıb.
2009-cu ildən bəri 10 il ərzində həmin regionlarda ciddi irəliləyişə nail olunmalıydı: iş yerlərinin açılması, abadlıq-quruculuq işlərinin şəhərləri cənnətə çevirməsi, aqrar sahədə məhsuldarlığın artırılması, turizmi inkişafı və s.
Lakin məlum oldu ki, əksər bölgələrdə yerli idarəetmə orqanları neft pullarının gəlhagəl vaxtında dövlətin büdcəsini talan ediblər, sərvətlərə sahibləniblər.
Onlar mərkəzi küçələri bəzəməklə kifayətlənib büdcədən ayrılan milyonları öz imarətlərinə, övladlarının istirahətinə, biznesə yatırıblar.
Elə ki, neft ucuzlaşdı, manat iki dəfə devalvasiya oldu, rayonlara dotasiyalar dayandırıldı, onda ayılıb gördülər ki, büdcə boşalıb, icra başçıları padşahlara çevrilib, rayonlar inkişaf etməyib, əhali narazıdır, şikayətlər çoxdur.
Prezident dəfələrlə icra hakimlərinə xəbərdarlıq elədi ki, özlərini yığışdırsınlar, uşaqlarının harınlığına son qoysunlar, camaatla işləsinlər, dotasiya da yoxdur və rayonlar öz resursları hesabına ayaq üstə dayansınlar. Lakin bəzi rayonlarda hələ də heç bir dəyişiklik yoxdur.
Reportyor.info-nun mediaya istinadən verdiyi xəbərlərdən biri ondan ibarətdir ki, büdcənin xeyrini görməyənlər sırasında Lənkəran xüsusi diqqət çəkir. Cənub mirvarisi, vaxtilə “xan Lənkəran” adlanan bu zonanın problemləri başından aşıb-daşır.
Əkin-biçin üçün fermerlərə şərait yaradılmayıb, işsizlər ordusu formalaşıb, əhali yalnız bir mərkəzi bazarın hesabına və Rusiyada işləyənlərin göndərdiyi pulla, İran bazarları ilə dolanırlar.
Bu bölgədə iş saatlarında kafe və çayxanalarda çoxlu kişi görmək olar. Sakinlər bunun səbəbinin işsizlik olduğunu deyirlər.
Sahibkarlığın inkişafından söhbə açıla bilməz. Əksinə, icra başçısı Taleh Qaraşov özü bu işlə məşğuldur. İddialara görə, dəniz kənarında hotel tikdirib və istifadəyə verilmək üzrədir.
RİH yayılan xəbəri təkzib eləsə də, yerli sakinlər təkidlə bildirirlər ki, hotel T.Qaraşovun şəxsi biznesidir. Biznesin inkişaf miqyası hotellə məhdudlaşmır.
Sosial şəbəkələrdə xəbərlər var ki, T.Qaraşovun oğlu Lənkəranda düyü biznesinə girişib. Lənkəranda hektarlarla sahəsi olduğu iddia edilən icra başçısının oğlu düyü əkdirir, pul qazanır.
Qaraşovun oğlu Lənkəranda tamet – metlax biznesi azmış kimi, düyüdən də pul çıxarırmış.
Bir müddət əvvəl isə yayılmış xəbərlərdə deyilirdi ki, Taleh Qaraşov və onun 11 nəfər ailə üzvü (övladları və nəvələri) AZAL şirkətinin Bakı-Praqa reysi ilə Çexiyaya uçub.
Qaraşovlar ailəsi Praqadan da Karlovı Varı şəhərinə gedib. Maraqlıdır ki, Qaraşovların bütün aviabiletləri biznes-klassa alınıb. Yəni icra başçısı təyyarənin biznes-klass salonuna faktiki olaraq bütün biletləri alıb.
AZAL-da bir biznes-klass biletinin qiyməti 1500 manatdır. Deməli, aylıq maaşı 2 min manata yaxın olan məmur təkcə aviabiletlərə 165000 manat xərcləyib.
İcra başçısı və ailə üzvləri Karlovı Varıdakı dəbdəbəli “Carlsbad Plaza” otelində yerləşiblər. Bu oteldə bir nömrənin sutkalıq qiyməti 2 min dollardır. Qaraşovlar ailəsi oteldə 6 otaq götürüblər.
Yəni ailənin gündəlik hotel xərci 12 min dollar təşkil edib. İcra başçısı və ailə üzvləri bu oteldə 21 gün qalıb.
Ailənin təkcə hotel xərcləri 251 min dollar olub”, – deyə məlumatda deyilirdi. Sonra RİH tərəfindən bu məlumat da təkzib olunmuşdu.
Digər informasiyada bildirilirdi ki, icra başçısı Xanbulanda villa alıb və daha çox orada qalır. Amma “od olmayan yerdən tüstü” çıxmır və son məlumatlar təsdiqləyir ki, Qaraşovlar kifayət qədər oliqarxlaşıblar.
Mediada dolaşan məlumatlardan biri də beləydi ki, başçı oğlu azərbaycanlı müğənniyə 120 min manata “Porşe” markalı avtomobil alıb.
Onu da deyək ki, icra başçısı aparatda ciddi dəyişikliklər edib. İndi komandasında əsas fiqur müavini Möhübbət Babayevdir. Vüqar Məmmədov və Xalid Rəhimov isə yeni müavinləridir.
Mediada gəzən informasiyalara görə, Qaraşov Xətai rayonuna icra başçısı gətirilə bilər.
Qarşı tərəfin mövqeyini öyrənməyə hazırıq.
REPORTYOR.info
Discussion about this post