Hüquq müdafiəçisi, Bakı şəhəri, X.Məmmədov küçəsi, ev 21, mənzil 27 ünvanın sakini Səyarə Heydərova dəfələrlə M.Ə.Əfəndiyev adına 2 saylı Şəhər Kliniki Xəstəxanasına müraciət etsə də xəstəxana onu qəbul etməkdən imtina edib.
Bunu Avrasiya.net-ə onun özü bildirib.
S.Heydərovanın sözlərinə görə, nevroloji problemi olduğundan vəziyyəti getdikcə pisləşir: “Dəfələrlə evə təcili tibbi yardım gəlib. Halım pisləşir. Müalicə almaq üçün həmin xəstəxanaya müraciət etdim, hətta aprelin 3-də getdim ora. Adımı jurnala yazdılar ki, gözlə. Niyəi gözləməyimin səbəbini demədilər, heç yaxına buraxmadılar məni”.
SşHeydərova onu da qeyd edib ki, bu məsələni aydınlaşdırmaq məqsədilə Səhiyyə nazirliyinin Mətbuat Xidməti ilə də əlaqə saxlayıb. Ona deyiblər ki, aydınlaşdırdıqdan sonra cavab veriləcək: “Amma bu vaxtadək cavab verməyiblər. Mən Azərbaycan vətəndaşıyam, xəstəxanada müalicə almaq hüququm var. Mənim hüquqlarım niyə pozulur, bilmirəm”.
Xatırladaq ki, S.Heydərova “KQB”nin III bölməsinin rəisi olan, 1990-cı ildə dünyasını dəyişən mərhum polkovnik Rövşən Heydərovun qızıdır.
M.Ə.Əfəndiyev adına 2 saylı Şəhər Kliniki Xəstəxanası ilə əlaqə saxlamaq cəhdimiz alınmadı. Xəstəxananın rəhbərliyinin də mövqeyini dərc etməyə hazırıq.
