Tovuz rayonu istiqamətində gedən döyüşlər zamanı qəhrəmancasına şəhid olan General-mayor Polad Həşimovun ailəsinə ziyarət edənlərin ardı-arası kəsilmir. P.Həşimovun ailəsini ziyarət edənlər arasında şou-biznes nümayəndələri də var. Şou əhlinin şəhid ailəsini ziyarət etməkdə məqsədi ailəyə mənəvi dəstək olmaq deyil, şəhid anası ilə şəkil çəkdirib sosial şəbəkədə yaymaqdır. Beləliklə, onlar özlərinə ucuz reklam qazanırlar. Hətta şairə və aparıcı Nazilə Səfərlinin şəhid general Polad Həşimovun ailəsini ziyarət etdikdən sonra generalın anası ilə foto paylaşıb və ailəyə kondisioner hədiyyə göndərərək bunu sosial şəbəkədə yayıb. N.Səfərlinin bu hərəkəti sosial şəbəkə istifadəçiləri tərəfindən şəhid anasına və ailəsinə hörmətsizlik olaraq qiymətləndirilib. Şəhid anası isə N.Səfərlinin onlara göndərdiyi kondisioneri geri qaytarıb. Şəhid anasının kondisioneri geri qaytarması tək sosial şəbəkə istifadəçiləri tərəfindən deyil, eyni zamanda ölkə ziyalıları tərəfindən də yüksək qiymətləndirilir. Şəhid ailəsi bu hədiyyəni qaytarmaqla çox doğru addımı atıb. O ananın torpaq yolunda övladı şəhid olub. Şou-biznes təmsilçisi isə göndərdiyi 300-400 manatlıq bir şeyi isə paylaşır.
“Şəhid anası baş sağlığı adı ilə şəkil çəkdirməyə gələn şou əhlinə abrına qısıldığı üçün söz demir, ancaq onlarda…”
Psixoloq Könül İsmayılova bildirdi ki, şou-biznes nümayəndələri şəkil çəkdirmək üçün şəhid ailələrinin qapısında növbəyə düzülüb: “Şəhid anası da abrına qısılıb, onlara bir söz demir. Baş sağlığı verməyə gedibsiz, lap yaxşı, ancaq ordan foto paylaşmaq nəyə lazımdır? Şəhid anasının ona göndərilən hədiyyəni geri göndərməklə düzgün addım atıb. Məndə olan məlumata görə, bu günlərdə bir şirkət sahibi şəhid ailəsinə ev verib, lakin adının açıqlanmasını istəməyib. Ümid edirəm ki, şirkət sahibinin bu jesti şou əhli üçün dərs olar”. Son olaraq bildirək ki, öz maaşı ilə kazarma təmir edən, əsgərinə maddi yardım edən, ona verilən evi şəhid ailəsinə bağışlayan bir oğulun anasını kondisionerlə sevindirmək düzgün deyil. Çünki bu ana dünya nemətlərinin üstündə bir varlıq itirib, onu heç nə ovuda bilməz.
