Mingəçevir.İnfo saytı “Valensiya Azərbaycanlıları” Cəmiyyətinin sədri, diaspor fəalı Mübariz İbrahimlə müsahibəni təqdim edir:
– Mübariz bəy, nə zamandan İspaniyada yaşayırsınız və Valensiyada nə qədər soydaşımız yaşayır?
– 2005-ci ildən İspaniya Krallığının Valensiya şəhərində yaşayıram. Hal-hazırda bildiyimiz qədər Valensiyada 40-a yaxın azərbaycanlı yaşayır. Qeyd edim ki, hər il bir neçə tələbəmiz də təhsil almaq üçün bura gəlir.
– Soydaşlarımız arasında birlik sizi qane edirmi?
– Bayramlarda, hər hansı tədbirlərimizdə və asudə vaxtlarımızda onlarla tez-tez görüşürük, bir-birimizə dəstək veririk və bundan sonra da verəcəyik. Bəzi hallarda isə işlə əlaqədər olaraq soydaşlarımız tədbirlərimizə qatıla bilmirlər. Ancaq onlar da əlindən gələni heç vaxt əsirgəməyiblər. Hər kəsdən razıyıq. Həmişə belə mehriban olmalıyıq ki, birliyimiz və həmrəylimiz güclü olsun.
– İspaniyada ölkəmiz barədə təsəvvürlər nədən ibarətdir?
– Artıq İspaniyada ölkəmiz haqqında yaxşı təsəvvürlər formalaşıb. İspaniya xalqı Azərbaycanı Avroviziya, Formula 1, İslam Oyunları və digər önəmli beynəlxalq tədbirlərlə tanıyır.
– Valensiya mediasının ölkəmizə olan münasibəti necədir?
– Yerli media ilə əlaqələrim çox yaxşıdır. Ən əsası onlarında bizim ölkəyə olan münasibətləri çox müsbətdir. Bundan sonra da media ilə sıx əməkdaşlığı gücləndirəcəyik.
– Bu yaxınlarda Barselonada erməni separatçılarının konserti təşkil olundu. Siz də tədbirdə iştirak edirdiniz. Bu barədə nə deyə bilərsiniz? Ümumiyyətlə, bu kimi fəaliyyətlərə qarşı onlara hüquq çərçivəsidə mübarizə aparmaq mümkündürmü?
– Mart ayının 31-i Barselonada erməni separatçılarının keçirtdiyi konsert demək olar ki, başlarına çökdü. Onlar orada 600 nəfər (bəlkədə çox) idi. Bizi görən kimi konsertin vaxtını dəyişdilər və hamısı çölə çıxmağa başladı. Bizlərdən qorxduqları üzlərindən hiss olunurdu. Biz bir azərbaycanlı kimi, bir əsgər kimi qarşılarına keçib, öz sözümüzü dedik. Əsgərlərimiz necə ki, səngərdə düşmənlə üz-üzədirsə, biz də burada onlarla qarşı-qarşıya dayandıq. 600 nəfərə qarşı 31 nəfər olmağımıza baxmayaraq, bu kimi vəziyyətlərdə vətəndaşlarımızı fəal olmağa çağırıram. Birliyimiz bizim qələbəmizdir. Və ermənilər də bizim nə qədər güclü olduğumuzu yaxşı bilir. Onu da qeyd etmək istəyirəm ki, bu kimi hadisələrdə hüquq çərçivəsində mübarizə aparmağımız lazımdır.
– Qarabağ məsələsi ilə ispan cəmiyyəti məlumatladırmı?
– Artıq ispan cəmiyyəti Qarabağ məsələsi barədə məlumatlıdır. Cəmiyyət olaraq Qarabağ məsələsini daha da tanıdacağıq. Bununla bağlı tanıtım fəaliyyətimiz davam edir. Fürsətdən istifadə edib, Qarabağla bağlı keçirilən tədbirlərdə iştirak edən hər bir soydaşımıza öz minnətdarlığımı bildirirəm. Biz bir daha düşmənə necə mübariz olduğumuzu göstərdik. İnşallah, Allahın izni ilə Qarabağımızı tezliklə düşmən işğalından azad edəcəyik…
